Nos a tuma nota di e retiro di e director di WEB y aunke oficialmente ningun hende sa e motibo real di su retiro, ta bisto cu ta e asunto di hedging y e hecho cu WEB lo ta den rood ta e motibo di e retiro aki. Pero si ta asina, e ora ta na su lugar pa Minister De Meza, e Hunta di Supervicion y e director di Utilities tambe bay cas.

Hunta di Supervicion di WEB mester bay cas
E asunto di hedging a perhudica tur hende y negoshi riba e Pais aki y te ainda Pueblo no sa kiko a bay fout y kendenan ta esnan responsabel pa e eror gravisimo aki. A laga traha un rapport riba e decicionnan tuma den WEB riba hedging, pero e rapport no ta completo. Minister De Meza a bin Parlamento y a sinta gania cu e no sa kiko a bay robes. Fraccion di MEP a bin cu un mocion pa Algemene Rekenkamer haci un investigacion riba entre otro e rol cu Utilities y Ministernan De Meza y Eman tabata tin den e toma di decicion cu ta concerni e hedging aki, pero e mayoria den Parlamento no tabata kier e investigacion aki wordo haci. Awor si ta retira e director di WEB en conneccion cu e hedging mal haci, anto e ora a base di e rapport incompleto aki mes, mester manda full e Hunta di Supervicion cas.

E director di Utilities mester bay cas
No mester lubida cu e director di Utilities NV tambe ta responsabel pa ehecuta e maneho energetico di Gabinete Eman. Un decicion den cual ta hedge casi 100% di e heavy fuel oil na WEB, ta un decicion cu no ta wordo tuma sin cu e director di Utilities sa. Pues si e director di WEB wordo manda cas pa e asunto di hedging, anto e ora e director di Utilities tambe mester bay hunto cune.

Ministernan De Meza y Eman mester bay cas
E asunto di hedging for di e punto di bista di tene tarifa stabiel ta un vision di Ministernan De Meza y Eman cu a keda aproba den Dialogo Social na augustus 2012. Ta e vision aki Utilities ta ehecutando. Pesey si e director di WEB mester bay cas pa ehecuta e vision di e gobierno aki, anto e ora e authornan di e vision, Ministernan De Meza y Eman, tambe mester bay cas.


17 juni 2015

Expresionnan haci den e articulo aki no necesariamente ta refleha opinion di ArenaPoliti.co