Gabinete ME II: MFA Noord ta e prome edificio energeticamente auto-suficiente di Aruba
Prome Minister e team ehecutivo di MFA inspecionando e trabounan di instalacion
ORANJESTAD - Gabinete Mike Eman tin e meta su dilanti di haci Aruba un pais energeticamente sostenibel pa 2020. Tin varios ehempel di proyectonan, manera e parkeerplaats di Aeropuerto, cu ta genera coriente pa yuda den e proposito aki. E edificio Multi-Funcional di Noord (MFA) ta bay ta e prome edificio na Aruba cu ta totalmente sostenibel. E sistema di panelnan solar ta genera suficiente energia pa abastece e necesidadnan di edificio na Noord. E sistema por te hasta produci suficiente coriente cu e por suminstra e ‘grid’ di ELMAR cu e exceso.
Den presencia di miembronan di team ehecutivo di MFA manera Anky Vrolijk y Harm van Sjeip como tambe gerencia di MFA Noord, Richard Tromp y Chris Figaroa, Prome Minister Mike Eman a subi riba e dak di e edificio grandi y moderno ubica na crusada principal di Noord diabierna ultimo. Aki el a combersa cu e trahadonan cu ya caba a cuminsa cu e trabou di instalacion di e panelnan solar y nan conexion pa suministra coriente na e edificio.
Compania local RETRACO ta encarga cu instalacion di e sistema di panel solar di MFA Noord. Director di RETRACO, Sr. John Reyes tabata presente supervisando e trabounan. El a indica cu tur cos ta canando segun plan y den e proximo 10 dia, ta finalisa e proyecto. Jamil Werleman, di oficina di MFA cu a coordina e proyecto di panelnan solar, a reitera loke Sr. Reyes a expresa y a bisa cu e comunicacion entre tur partido envolvi, incluyendo WEB y ELMAR a haci cu e trabounan ta bayendo hopi bon.
Den su vision pa haci Aruba sostenibel, Minister President ta buscando pa mas tanto edificio di Gobierno, incluyendo scolnan, genera nan propio coriente y contribui na e ‘grid’ di Aruba. Pronto ta bay inicio proyecto publico caminda 20 edificio di scol rond di Aruba ta haya panelnan solar riba nan dak pa asina nan genera nan propio coriente, y contribui tambe na e produccion na nivel nacional.
E trabounan aki ta hiba e prome MFA na Aruba un poco mas cerca di su apertura y nos pais mas dilanti den su meta pa ta 100% sostenibel.
Pa Aruba crea un suministro di energia sostenibel ta algo hopi importante pa economia y bienestar general riba termino largo. Costo di combustibel pa produci coriente ta impredicibel y ta pronostica cu na cierto momento e costonan ta bay subi incontrolabelmente riba mercado mundial. Ariba dje, solo y biento ta recursonan natural cu Aruba tin mas cu suficiente y no ta costa nada pa haci uzo di nan.
E iniciativanan di Minister President Mike Eman, esta sostenibilidad y facilidadnan multifuncional ta bin y traha hunto na beneficio di comunidad. Si tur cos cana bon, edificio di MFA Noord ta habri den luna di juli.
Expresionnan haci den e articulo aki no necesariamente ta refleha opinion di ArenaPoliti.co