Situacion tenso entre Grupo di 7 y Prome Minister di pais Aruba 

ORANJESTAD --  Durante conferencia di prensa di MEP lider di MEP a duna su opinion riba e situacion tenso entre e Grupo di 7 y Prome Minister Mike Eman, cu a cuminsa desde diadomingo siman pasa, caminda cu Grupo di 7 tabata manifesta pacificamente te ora e Prome Minister a bai busca confrontacion. Segun sra. Wever-Croes tur e lidernan a wordo yama pa Mando Policial y a hasi palabracionnan cu tur.

“Nos a palabra cu nos lo manda un mensahe di no violencia y nos lo preveni confrontacion. Sin embargo siman pasa nos por a mira con e Prome Minister a kibra palabracion. Pasobra el’a manda un grupo di coordinador di entre 60 pa 70 hende bai agredi Grupo di 7, di menos di 10 persona, cu shovel y machete. E grupo di 7 no tabata ni den cercania di e Prome Minister, pero asina mes, sigiendo instruccion di Henny Eman, e grupo di 60 pa 70 coordinador a bai agredi esnan cu tabata manifesta pacificamente. 

Cu esaki Mike Eman a demostra cu regla no ta conta, palabracion no ta conta. Cu e ta scohe pa confrontacion, cual ta hopi iresponsabel pa e lider di nos pais.

E derecho pa manifesta ta un derecho ancra den nos constitucion. Si un dia un grupo di 10 persona lanta y dicidi di bai manifesta, ningun hende por kita e derecho aki for di nan. Ni Mike Eman. Si Mike Eman no kier pa hende critic’e, e no por manda 60 pa 70 hende bai agredi nan! Esey ta un actitud di un cobarde, y ta demostra cu e no tin control di su facultadnan mental.

Nos ta condena violencia, nos ta condena provocacion, nos ta condena e forma iresponsabel cu cual Mike Eman ta actuando. Si e no cambia su forma di actua, e sa cu ta problema so e ta ocasiona, y ta e ta e unico responsabel pa esaki”, líder di MEP Evelyn Wever-Croes a duna di conoce.

Expresionnan haci den e articulo aki no necesariamente ta refleha opinion di ArenaPoliti.co