Nos Pais tin yen di reto y ta parce cu Minister Eman ta core biaha bay den exterior pa no mester enfrenta ningun di nan. Poco dia pasa mes, BBO a subi na Aruba y Minister Eman tabata ausente. Awor aki ainda no tin claridad riba e supervicion financiero di nos Pais door di CFT y Minister Eman no tey pa splica Pueblo nada ya cu e ta duna speech den conferencia na Toronto, Canada. Y ya caba e mandatario ta preparando biahe pa Paris pa bay bolbe duna speech. E modo di proceder aki ta un falta di respet pa Pueblo di Aruba. Minister Eman mester atende retonan na cas of e mester retira pa modela como orador den exterior.

Enves di elemina ta subi BBO
Dia di e reunion publico na Parlamento pa hisa BBO, Minister Eman a briya cu su ausencia. Presidente di Parlamento a bisa cu Minister Eman tabata di biahe, pero no tin ningun corespondencia pa bisa unda Minister Eman tabata. Remarcabel ta cu e dia despues si Minister Eman tabata plak sticker di orguyoso di mi Pais. Esaki ta un falta di respet y un bofta den cara di Pueblo.

Supervicion financiero
Minister Eman a firma protocol dia 2 mei 2015 pa hinca Aruba bou di supervicion financiero di Hulanda for di 1 augustus 2015. Pero faltando menos cu un luna ainda ningun hende sa kiko ta bay pasa. A core nombra un representante den CFT pa Aruba, pero ningun ley pa supervicion financiero a yega Parlamento. Mas tristo ta cu Minister Eman no ta splica kiko e consecuencia lo ta si su Gobierno no cumpli cu e deadline di 1 augustus 2015.

Retonan berdadero di nos Pais
Minister Eman ta tira speech den exterior pa gaba cu e retonan energetico, economico y social di nos Pais. Pero e no ta splica con ela castiga e Pueblo aki cu prijs halto pa awa y coriente pavia di hedging. E mandatario no ta bisa con ela stanca economia di e Pais aki cu su falta di decicion, cu su medidanan door di mal gobernacion. Y claramente e no lo bisa con su gobierno a haci e Pueblo aki pober cu un costo di bida haltisimo.

Minister President of orador pa modela den exterior
Minister Eman no por sigi falta Pueblo respet boftando nan cu tanto biahe pa exterior sin cu e ta atende e retonan na nos Pais pa cual ela haya e confiansa y e mandato di e Pueblo aki. E ta un berguensa cu e Promer Minister di nos Pais ta core sconde den exterior pa no duna Pueblo cara. Minister Eman mester scohe, sea e ta Minister President di Aruba of e ta retira pa modela como orador den exterior.

13 juli 2015

Expresionnan haci den e articulo aki no necesariamente ta refleha opinion di ArenaPoliti.co