Den e maneho cultural di nos pais, Minister Otmar Oduber kier a incluyi mas arte den areanan publico. Un idea cu a sali for di e ultimo cumbre cultural nacional. E proyecto di Paardenbaai ta e prome proyecto cu ta den pleno ehecucion bou di e capa di arte publico. Ta trata aki di 8 cabay ubica den den pleno centro di cuidad cu ta representa e storia di Paardenbaai na den siglo 16. E ta refleha e importancia cu Aruba tabata tin pormedio di e negoshi cu tabata tuma lugar na Paardenbaai, cu a pone Aruba riba mapa e tempo ey caba.

Minister Otmar Oduber tabata di bishita serca e artista Osaira Muyale, conhuntamente cu representantenan di Aruba Tourism Authority, Departamento di Cultura, Infrateam y Sr. Renwick Heronimo cu ta guia e proyecto, pa mira desaroyo di e proyecto aki. Pa fin di e luna aki por mira e prome cabay den nos centro di cuidad.  

Pero no ta centro di nos cuidad so lo conoce obra nan di arte publico, dentro di poco ta inicia cu e proyecto di Domino na San Nicolas. Esaki ta pa refleha e cultura bibo y influencia grandi cu domino tin riba e bida di tur dia. Ambos proyecto ta un combinacion financia pa Aruba Tourism Authority y Mondriaan Fonds di Hulanda.

Arte den area publico no ta limita na e dosnan aki so. Intencion ta pa bin cu mas di e tipo di proyectonan aki bou di e capa di arte publico. Artistanan cu tin ambicion pa organisa tipo di proyectonan asina por acudi na Departamento di Cultura pa ricibi conseho riba esaki.

Importancia di proyectonan di e tipo arte publico, ta pa haci nos cultura, historia y arte general mas accesibel pa nos comunidad completo.

Expresionnan haci den e articulo aki no necesariamente ta refleha opinion di ArenaPoliti.co