Francis Jacobs di MEP: Con a para cu e investigacion di e avion cu a wordo derumba pa militarnan Venezolano den nos awa teritorial?
Ainda nos por corda con na fin di luna di Januari di e aña aki un avion cu matriculo Mericano segun medionan di comunicacion local, a ser derumba door di militarnan Venezolano y confirma pa Minister di Defensa di Venezuela. A ser confirma tambe cu e avion a ser derumba y a cay den nos awa teritorial. Sinembargo a ser haña varios pakete di (+400) ta flota y segun Ministerio Publico, a haci pruebanan cu a conduci positivamente na cocaina. Dia 29 di Juli di luna pasa ta net 6 luna cu e caso aki a tuma lugar y nunca mas no a tende nada. Sinembargo a keda atras varios pregunta cu nunca a ser contesta ni pa Ministerio Publico y ni pa Minister di Husticia Sr. Arthur Dowers. Na comienso di investigacion segun Ministerio Publico y Minister Dowers a declara cu no por divulga nada pa motibo di investigacion y awe nos ta mas di 6 luna leu y ainda pueblo di Aruba no a tende nada of talvez e investigacionnan no ta cla of talvez Ministerio Publico y Minister Dowers ta pensa cu e informacionnan aki no ta di importancia pa nos comunidad? Ta bon pa prensa local cuminsa investiga e asunto aki pasobra tin preguntanan cu ta interesante pa pueblo haña sa, manera kico a haci alrespecto mirando e hecho cu un avion a ser derumba den nos awa teritorial, cual tabata destino di e avion aki? E pregunta principal kico a haci cu e paketenan miyonario di droga cu a ser encontra, unda nan ta, ken tin nan y cuanto kilo a encontra. Mi ta spera cu minister Dowers bin padilanti y trece e informacionnan aki pa pueblo enberdad haña sa, pasobra pueblo tin derecho di haña sa tur cos cu tin di haber cu Aruba. Spera cu prensa local haci e pregunta aki na Sr. Dowers den nan siguiente rueda di Prensa cu e Minister encuestion, pasobra pueblo tin derecho di sa, manera mi a menciona.
Expresionnan haci den e articulo aki no necesariamente ta refleha opinion di ArenaPoliti.co