MEP A PIDI E REUNION AKI MAS DI UN ANJA Y MEY PASA!

ORANJESTAD – Parlamento a yama un reunion publico diabierna awor pa debati riba e problema di hospital y su construccion. E reunion aki fracción di MEP a pidi dia 7 di februari 2014, mas di un anja y mey pasa! Presidente di parlamento a yama e reunion aki dia 26 di februari 2015, un anja mas laat, pero a suspende esaki pa algún siman. Sin embargo el’a lubida riba esaki y awor numa, mas di un anja y mey despues, e ta yama e reunion aki.
Aki bo ta mira claramente cu parlamento NO ta funciona debidamente.

Reglamento di Orden di Parlamento ta stipula claramente den articulo 23 inciso: “Indien de vergadering op de ingevolge het eerste lid voorgeschreven wijze is aangevraagd, wordt zij binnen dertig dagen gehouden. Ingeval van schorsing dient deze vergadering binnen dertig dagen te worden hervat en afgerond”.
Pues e reunion aki mester a wordo yama dentro di 30 dia cu ela wordo pidi. Y despues cu el’a wordo suspendi e mester a wordo yama bek dentro di 30 dia. Pero esey no ta e caso. Y no ta un incidente, pasobra nos tin un lista di varios reunion cu nos fracción a pidi, pero cu e presidente di parlamento ta nenga di atende cun’e, entre otro di refinería, di cobramento pa piki sushi, pa e proyecto di Hard Rock Hotel, etc. Ya ta varios biaha caba cu fracción di MEP ta urgi e presidente di parlamento pa yama e reunionnan aki mas pronto cu ta posible. Copia di e cartanan aki a bai Semper pa Gobernador, pa representante di Hulanda na Aruba VNO y pa politiconan na Hulanda, pa asina tur hende realisa cu e parlamento aki NO ta funciona.

No ta un secreto cu nos fraccion ta hopi critico riba e forma con Parlamento ta funciona. Y no ta pa mas. E crisis financiero cu nos ta aden ta debi na e mal funcionamento di e parlamento aki. Ta pasobra e mayoria den e parlamento aki no a controla gobierno, of no kier a controla gobierno, awor nos tan a borde di bancarota, y bou di curatela.

Cuanto problema nos por a evita si nos a yama e reunion aki na tempo? Cuanto placa nos por a scapa pueblo?

Y e hecho cu parlamento no a yama e reunión importante aki, ta hasi e parlamento, of por lo menos, e mayoría di e parlamento aki y e presidente di parlamento complice den e corupcion na Hospital. Bo no por yam’e otro. Ora un gobierno deliberadamente ta pone pueblo paga 36 miyon EXTRA pa un proyecto, djis pa privilegia un amigo, bo no por conclui otro cu ta corrupcion!

Expresionnan haci den e articulo aki no necesariamente ta refleha opinion di ArenaPoliti.co