Rudy Richardson, presidente di CONGRESO 2015, ta extende un invitacion na Aruba en general, y na lidernan di bario, mienbronan, simpatisantenan, votadornan y campanjadornan pa e CONGRESO 2015 di Partido MEP.

Segun nos Statuut cada 4 anja nos partido mester eligi un lider, y awor ta 4 anja caba cu sra. Evelyn Wever-Croes a wordo eligi. Pues ta toca turno pa nos organisa e Congreso 2015.

E Congreso 2015 lo tuma lugar diadomingo atardi, 27 september na Cas di Cultura.

Cas di Cultura tin un significacion emocional hopi valioso pa partido MEP. Eyden  mayoria di Congresonan di MEP a tuma lugar. Eyden sr. Nel Oduber a wordo ACLAMA lider di partido, y sr. Betico Croes den felis memoria tambe a tene varios Congreso den Cas di Cultura. Un lugar pues cu nos tin recuerdonan bunita pa partido MEP.

Considerando tambe e gasto envolvi cu otro lugarnan y considerando e situacion financiero malisimo di Aruba, nos a scohe pa organisa Congreso 2015 na Cas di Cultura.

E Congreso 2015 ta habri pa tur hende, especialmente tur simpatisante di partido MEP, lidernan di bario, campanjadornan y nan famia. Pueblo di Aruba tambe ta keda invita pa e Congreso aki.

E mesun fin di siman partido MEP ta anfitrion di e Congreso di COPPPAL, cu ta Conferencia Permanente de Partidos Políticos de América Latina, y varios delegado di otro pais lo ta presente na nos Congreso.

Congreso lo cuminsa 4.00 p.m te 9.00 p.m. y porta lo habri 3.00 p.m. E prome 500 personanan cu registra lo ricibi un bunita regalo cu e logo nobo di MEP ‘SOLO TA SALI PA NOS TUR’. Entrada ta completamente gratis.

Na final di e anochi nos lo tin un grandioso rifa di un auto Hyundai EON 2015, ticket ta na benta awor caba pa 5 florin.

Pa medio di esaki, den mi calidad di presidente di Congreso 2015, mi kier extende un invitacion na Aruba en general, y na nos lidernan di bario, miembronan, simpatisantenan, votadornan y campanjadornan pa asisti na nos Congreso 2015, diadomingo awor 27 september  na Cas di Cultura.

Esaki no ta simplemente un Congreso. Esaki ta e Congreso cu nos ta bai re eligi nos líder. Aruba y nos cu ta hiba e lucha cu Evelyn no por ta mas agradecido pa tur su trabao duro desde 13 Mei 2009 su experencia amplio den temanan fiscal y abogado combina cu su style di un bon Socialdemocrat ta haci cu e ta e mihor político pa lidera MEP. Cu nos digno pueblo deposita nan confiansa den Movimiento Electoral di Pueblo pa Goberna Aruba como Prome Minister y un Gabinete cu lo percura pa traha cu un solo meta: E maximo felicidad di e pueblo di Aruba den tur sentido. Dia 27 September 2015 na Cas di Cultura riba un Diadomingo ban duna nos lider Maximo e respaldo un bes mas pa 4 aña. Ami ta convenci cu e lo hiba nos pueblo den un desaroyo nobo y progresivo

Expresionnan haci den e articulo aki no necesariamente ta refleha opinion di ArenaPoliti.co