Mas detaye lo ta conoci pronto... 

Oranjestad - Diabierna mainta Minister di Finanzas, Angel Bermudez a tuma medidanan diciplinario contra 7 miembro di cuerpo duanero pa asina por investiga, evalua informacion y indicacionnan serio cu posibelmente e duaneronan aki lo ta envolvi den actonan fraudulento den nan funcion actual. Mientras tanto e miembronan di Cuero Duanero aki lo permanece “non-actief” segun a mandatario a splica.

Minister Bermudez a indica cu pa basta tempo caba Ministerio Publico ta hibando un investigacion penal riba cierto crimennan cu ta wordo cometi regularmente den comercio den cual aparentemente lo tin algun di nos ambtenaarnan envolvi. Consecuentemente, cu e datonan colecta pa OM a lanta sospecho grandi cu dentro di nos cuerpo duanero mes tin complice den e crimen nan aki, e mandatario a splica.

“Mi tin cu admiti cu e sucesonan aki tin ami masha indigna, pasobra hunto cu un grupo grandi, cu ta di bon boluntad, nos ta trahando duro pa mehora e funcionamento di nos cuerpo pa hisa nos calidad di bida riba e pida baranca aki”, asina e Minister Bermudez a expresa diabierna mainta.

Segun e mandatario di finanzas, e coleganan aki no ta afecta solamente e caha di Gobierno, pero tambe nan ta perhudica e pan di nan famia como tambe e reputacion di nan coleganan den cuerpo duanero. “E ta hopi lamentabel pa topa cu un grupito cu pa falta di integridad y pa propio beneficio, ta corumpi nos sistema cu cierto comerciantenan”.

Mientras cu e grupo aki ta permanece desactiva den nan funcion, e investigacion lo sigui su ruta pa asina por colecta tur  prueba necesario pa laga husticia castiga e actonan repudiabel cometi.

Finalmente Minister Bermudez a menciona cu den e momentonan aki no lo por duna mas informacion pa asina no stroba e investigacion cu ta andando. Sin embargo e mandatario a sigura cu tur detaye importante relaciona cu e caso aki lo wordo comunica por medio di prensa na nos comunidad asina nan ta conoci.

Expresionnan haci den e articulo aki no necesariamente ta refleha opinion di ArenaPoliti.co