Diahuebs mainta ALRA cu ta Aruba Luxury Retailers Association a sinta na mesa cu Minister Otmar Oduber pa papia riba diferente punto di atencion. Aruba Luxury Retailers Association ta den formacion y ta representa e negoshinan di luho riba nos isla representando e marcanan renombra na mundo. ALRA ta un grupo cu danki na e producto cu nan ta representa tin un influencia riba lo cual nos bishitantenan ta laga atras den nos economia. Den cuadro di cambionan fiscal cu lo por ta na caminda ya caba a sinta cu varios mandatario, entidadnan y tambe instancianan concerni cu turismo cu ta nan mercado principal. Secretaria di ALRA, Vanessa Quilotte ta splica cu e intencion ta pa splica e situacion unico cu nan ta confronta. "Nos ta e unico industria na Aruba cu nos prijsnan ta "fixed", pues nan no ta wordo determina pa nos mes y nos ta haya nos den e situacion cu tur impuesto y cada ahuste cu mester implementa, nos mes como compania mester absorba esaki di e margennan cu ya caba ta bou di presion." Pa ALRA ta importante pa Gobierno di Aruba ta na altura di e situacion y kico e ta nifica pa e industria.

E negoshinan aki ta enfoca netamente riba e mercado di turistanan afluente cu ta esnan cu nos kier sigui atrae pa nos isla. Den esaki Sra. Quilotte a remarca cu ALRA ta den mesun liña di pensamento cu Minister Otmar Oduber. "Nos mester di e turistanan afluente na Aruba pero pa esaki nos mester tambe e productonan cu e turistanan aki ta busca. Shopping ta e di dos motibo cu nos bishitantenan ta scoge Aruba y nan ta busca productonan di marca y di luho. Aruba mester provee e opcionnan aki pa por atrae e turistanan desea."

Vision di Ministerio di Turismo ta basa riba atrae turistanan cu ta gasta mas y ta contribui na economia di nos isla. Minister Oduber ta comenta " E strategianan actual di ATA ta enfoca netamente riba e turista afluente. Pesey ta importante pa tin e tipo di negoshinan aki riba nos isla pa por logra e meta aki."

E reunion tabata uno fructifero segun e mandatario unda na un forma hopi habri a intercambia hopi informacion. Sr. Oduber ta bisa: "Den cierto sentido a calma hopi inkietud cu  por tabatey, pero a papia tambe di otro posibilidadnan, tanto pa e grupo aki como destinacion Aruba como producto y kico esaki ta representa den economia di nos isla."

E reunion a conta cu representacion di departamento di impuesto, tambe esnan cu tabata encarga cu e cambionan fiscal den e ley. Minister Oduber ta finalisa bisando: "Ya caba hunto cu colega Minister Bermudez y Conseho di Minister, a yega na un conclusion cu e grupo aki ta importante y den e restructuracion fiscal a tuma nota cu mester sigura e grupo aki nan permanencia y kisas te hasta por incentivanan pa keda. Mi ta kere cu e la bira mas bisto pa e departamentonan cu a compaña nos den e reunion aki cu un incentivo por no solamente sostene e grupo aki of nos turismo pero mas cu tur cos lo por beneficia nos economia na un forma macro, si nos por mantene e tipo di negoshinan aki, elevando Producto Aruba cu lo por atrae e turistanan afluente."

A conclui cu lo continua cu e comunicacion estrecho pa por bin cu sugerencianan na Conseho di Minister, na e Minister di Finansas unda cu ainda prome cu fin di aña por yega na un forma pa implementa esakinan.

Expresionnan haci den e articulo aki no necesariamente ta refleha opinion di ArenaPoliti.co