Den un entrevista Parlamentario, Sr. Guillfred Besaril, a duna e punto di bista di Fraccion di MEP den Parlamento pa loke ta trata e tema di "Criminalidad y Seguridad". Parlamentario Besaril a declara lo siguiente:

"Siman pasa Aruba a sera un siman atrobe den cual e comunidad a wordo asota pa un serie di ladronicia y hasta un caso serio di ladronicia cu maltrato. Den e caso specifico aki e malhechornan a mara un ciudadano cu tabata na pia di trabou y a maltrat’e pa nan por comete nan fechoria.
Un biaha mas nos tin cu constata cu e Minister encarga cu Husticia no ta compronde kico tur ta su tarea. Nos a nota cu Minister no kier distingui e diferencia entre combati criminalidad y prevencion y seguridad ciudadano. Prevencion ta loke ta percura pa nos hendenan ta sinti nan mes liber y safe di por cana riba caya. Ta di lamenta cu mas y mas esnan cu ta biba na Aruba ta haya e sintimento di no ta sigur mas. Ni den nan mesun cas! Magina bo cu nos a yega asina leu cu nos hendenan tin hasta miedo di bay retira placa na bancomatico.

E mandatario en cuestion ta pronkia cu cifranan di combatimento di criminalidad bisando cu cos na Aruba ta bon compara cu otro islanan den region. E manera di pensa di e mandatario, pues di compara Aruba cu otro islanan, ta demostra e mandatario su falta di convivincia cu e Pueblo. Ademas e ta muestra cu e no ta ni trata di compronde e sentido di insiguridad cu ta reina den Pueblo. Un biaha mas nos Fraccion ta dirigi e pregunta na e titular di Husticia: "Señor Minister, ta cu ki cara bo ta wak e señora cu a cab’i wordo atraca den su mes un cas y bis’e cu ‘cos ta bon na Aruba pasobra nos cifra di criminalidad ta mas abou cu den region?"

Ta p’esey Fraccion di MEP ta boga ya pa basta tempo pa mas patruya riba caya. E ta logico; mas patruya riba caya ta contribui di biaha tanto na e sintimento di siguridad den nos comunidad como e prevencion di criminalidad. Nos Fraccion no por caba di compronde e maneho di e Minister di Husticia. Ta parce cu su persona no tin Aruba na pecho, ya pa 3 aña sigui no a introduci niun personal nobo atravez di Scol pa Polis den Cuerpo Policial. Ta tira culpa riba un “High Season” den criminalidad pa sconde su mal maneho, pero na final no tin nada otro cu conclui cu e prioridadnan di su maneho y di Gobierno ta totalmente robez!" E Parlamentario a termina.

Expresionnan haci den e articulo aki no necesariamente ta refleha opinion di ArenaPoliti.co