Contrario na e ponencianan ridiculo di Baba Herde:  

No ta falta un dia cu e lider di fraccion di AVP, Baba Herde ta sigui troce e berdad bisando cu ta su gobierno di AVP a logra percura pa “salba” e tres fondonan social, esta di APFA, SVB y AZV. Na diferente ocasion partido MEP a contraaresta e ponencia ridiculo aki, pero Baba Herde ta sigui insisti y ta kere fielmente cu locual e ventila mester wordo traga door di tur hende den e pais aki. Ta pesey partido MEP kier refresca Baba Herde su memoria di tur loke e participantenan den e 3 fondonan menciona mester a entrega durante e ultimo añanan y pa awe Baba Herde tur dia ta soña cu ta su gobierno supuestamente lo a “salba” e fondonan aki.

Medidanan den APFA

1. Gabinete Eman a aumenta e edad di pensioen di ambtenaarnan te 65 aña. Cu e aumento aki un ambtenaar cu den futuro lo bay cobra por ehempel 3000 florin pa luna di pensioen, finalmente ta entrega 180 mil florin den 5 aña di tempo. E suma aki ta keda den caha di APFA!
2. A corta den derechonan di ambtenaarnan door di aplica e Franchise. Gabinete Eman a aumenta e franchise cu tabata 14.059 florin te 17.616 florin. Riba e suma aki bo no ta acumula pensioen.
3. A corta den derechonan di ambtenaarnan door di aplica e Middelloonregeling.
4. A reduci e Duurtetoeslag di e ambtenaarnan di 36.1% te 17.7%, cual ta nifica un reduccion drastico di e suma cu e ambtenaar den futuro lo bay cobra na pensioen.
5. A reduci e porcentahe di acumulacion: Esaki ta e porcentahe di e base di pensioen riba cual bo ta acumula pensioen pa aña. E porcentahe a ser reduci for di 2.15% te 1.75% pa aña.

Alavez mester remarca aki cu gobierno di AVP a laga un debe astronomico di 277 miyon florin na 2001 y esaki di primanan cu nan no a traspasa pa APFA, mancando e fondo aki seriamente!

Medidanan den SVB

1. Gabinete Eman a aumenta e edad di pensioen di biehes te 65 aña. Cu e aumento aki un pensionado soltero ta entrega 63 mil florin den 5 aña y un pensionado casa ta entrega 108 mil florin. Tur e sumanan aki ta keda den caha di SVB!
2. A aumenta e prima di AOV cu 1% entrante 1 di januari 2014.
3. A aumenta e prima di AOV cu 1% entrante 1 di januari 2015.
4. A individualisa e prima di AOV pa parehanan casa. Cu esaki e parehanan casa lo no bay ricibi e sumanan di mas cu 4000 te cu mas di 6000 florin cu nan ta custumbra di haña tur aña ora di restitucion di belasting. E sumanan aki tambe lo keda den caha di SVB!

Alavez mester remarca cu un debe astronomico di 58 miyon florin cu Gabinete Eman tabatin na SVB a wordo exonera recientemente. E debe aki a encera sumanan cu gobierno a ricibi di e aseguradonan, pero cu gobierno pa di tantisimo vez no a traspasa esaki pa SVB. Cu esaki ta comproba cu gobierno di AVP tey solamente pa manca e fondo aki.

Medidanan den AZV

1. Gabinete Eman a aumenta e prima di AZV cu 1% entrante 1 di januari 2011.
2. A aumenta BBO cu 2% pa AZV (BAZV) na 2014 y 2015.
3. Segun e lista di 24 medidanan, gobierno lo reduci su contribucion na AZV drasticamente: 66 miyon florin na 2015; 68 miyon na 2016; 71 miyon na 2017 y 72 miyon na 2018.
4. Un gran cantidad di remedi original a ser remplasa pa remedi generico, p’asina AZV scapa placa, pero cu ta perhudica salud di e pashentnan.
5. Proximamente lo bay pidi contribucion propio pa bishita na Eerste Hulp, pa Huisartsenpost y tambe pa cada receta boticario

Pues mirando tur e medidanan cruel cu Gabinete Eman a impone riba lomba tur e participantenan di e 3 fondonan y cu gobierno mes no a hinca un solo debchi pa salba e fondonan aki, ainda Baba Herde tin e curashi pa sigui gaña pueblo cu ta Gabinete Eman ta e gran salbador di e fondonan di APFA, SVB y AZV?

Expresionnan haci den e articulo aki no necesariamente ta refleha opinion di ArenaPoliti.co