Como presidente di e organisacion “Nos Ta Aruba” mi ta kere cu mi ta haci bon di duna un splicacion extenso na comunidad di Aruba di e materia bastante complica di e proyectonan “PPP”, cu recientemente a ser cubri corectamente door di Amigoe y colega-comentarista Nico van der Zee, pero cu lamentablemente a lanta reaccionnan hopi incorecto, inspira pa politica, di Marjanne Havelaar, esta esun cu ta scirbi pa Mike Eman, y di e abogado di gobierno Johan Fat, kendenan di e manera ey ta trata na hustifica locual ta robez.
E topico riba su mes ya caba ta importante pa motibo di e centenares di miyones cu ta envolvi cu e proyectonan “PPP” aki, sin laga afor cu e proyectonan aki ta ser trata y aproba na un manera totalmente intransparente, mirando e secrecia y e scuridad misterioso cu ta rondona esaki.

Prome algun aspecto financiero. 
Ya na anja 2013 a ser informa cu Pais Aruba tabatin un debe di 3.412.400,00 florin, por cierto un suma duna ainda mucho abao y pues incorecto, locual den porcentahe kier meen un debe di 74.5% di nos entrada BBP (bruto binnenlands product), compara cu e norma internacional di 45%! E deficit riba nos presupuesto ta 9.3% compara cu e norma di 3%; e pago di interes ta 16% di nos BBP, compara cu un norma di 5%, den otro palabra un pago di interes riba debe di – no spanta! - 450.000 florin pa dia!!
E interes anual riba debe durante e ultimo dos añanan hasta a subi for di 160miyon te na 200miyon, pues 550.000,00 pa dia!!

E cuota di debe pa aña 2014 tabata 83.2% di nos BBP, mientras cu pa aña 2015 esaki hasta ta di 86.7%.
Bo a keda zonza y marea caba di e cifranan aki?
Hopi bon! Pasobra ta asina malo e situacion ta!
CAft a calcula cu lo dura sigur un 20 aña prome cu e debenan di gobierno yega na un nivel aceptabel di mas o menos 40% di nos BBP, y ta huzga y ta declara corectamente cu e proyectonan “PPP” no-productivo (esta proyectonan cu NO ta trece ningun entrada) NO mester ser inicia!!

*Pero e situacion ta pio ainda!
E gobierno NUNCA ta duna e  cifranan corecto.
Na aña 2014 “Nos ta Aruba” a calcula cu e debe nacional di Pais Aruba, cu gobierno a bisa cu pa e aña ey lo ta 3.856.000.000,00 florin, lo mester ser aumenta cu e suma di 651.000.000,00 pa e debenan na e fondo di pensioen APFA, SVB y AZV,  locual ta hiba e subtotal te na Awg 4.507.000.000,00, riba cua sinembargo ainda mester ser añadi e suma di Awg 954.200.000,00 pa proyectonan “PPP”, manera hospital, e “Green Corridor”, e Ringweg, J. F. K. school, HAVO, etc., pues un debe total di AWG. 5.461.200.000,00, o sea 54.612,00 florin pa persona, incluyendo mucha- y babynan!
Cu esaki un tata cu un famia di 4 tin un debe di no menos di 220.000 florin; esey ta insostenibel, inacceptabel, y ningun tata lo por sostene su famia decentemente cu un cargo asina.
Esey ta un debe pa persona (“per capita”) mucho mas grandi cu locual ta e caso na Spaña, Grecia of Cyprus; e ta un debe totalmente iresponsabel cu no tin ningun hustificacion; laga e abogado di gobierno Johan Fat anto no haci comosifuera e gobierno aki no a endeuda nos futuro generacionnan cu debenan impagabel, mescos cu e gobierno aki a endeuda tambe e siguiente gabinetenan.
Pagando Hulanda anualmente e debe mas un interes di 2% - esaki for di un supuesto surplus di 200miyon florin cu gobierno ta spera di alcansa anualmente riba e presupuesto, pero cu by the way e gobierno aki ta hopi leu di logra – lo tuma sigur 50 (cincuenta) aña pa paga e debe aki back; pagando e debe na e interes di 6% manera esaki a ser conveni, lo tuma 140 (cienticuarenta!) aña.
Asina malo e situacion di pais Aruba ta! Ni con bunita Mike, Marjanne y Johan kier pinta esaki!

Sigur, no! Bay gaña baca! Off-balance, asina ey mi tambe por.
Gobierno NO ta publica e cifranan, pasobra tur locual tin di haci cu e proyectonan “PPP”, na un manera astuto gobierno ta tene “off-balance”, locual kier meen cu NO ta tene cuenta cu e compromisonan di larga duracion pa e proyectonan “PPP” na momento cu ta determina e cuota di debe of e deficit anual riba e presupuesto.
Cu Johan Fat ta declara cu e gobierno aki no ta endeuda e futuro generacionnan, ta djis un ponencia simpel sin base, cu ni sikeira e ta hustifica, pero ta djis acepta cu e cifranan simpelmente ta keda scondi “off-balance”, y no ta ser considera of teni cuenta cu nan.
Den nos calculacionnan nos a tene cuenta cu 297miyon pa e Green Corridor, 253miyon pa hospital y 330miyon pa e Ringweg.
E ponencia di Marjanne Havelaar cu gobierno no por financia esaki, ta nonsense, mentira y engaño: e tempo aya Henny Eman no a laga traha hotelnan pa 800 miyon, di cua e financiamento a ser regla den un frega di wowo?
“Mester paga nomas ora cu tur cos a ser entrega sin ningun fayo”, tampoco ta berdad; wak e renobacion di Caya Betico Croes. Esey AINDA no ta cla; e fonteinnan no ta traha, e cayanan di acceso pa Caya Betico Croes no ta cla, y tur caminda tin hopi fayonan, pero pagonan ta sigui tuma lugar si!
“E miho contratistanan cu hopi experiencia internacional ta gana e destaho”; si, bay gaña baca! Esey nos por a weita cerca e contratistanan den Caya Betico Croes: eseynan tabata contratistanan chicito local cu diripiente a lanta, y cu ta famia di ministernan y parlementarionan!
Nico van der Zee no mag di scirbi cu e proyecto aki ta derochamento di placa, pero Nico tin razon si.
Den hopi otro pais e problema di un caminda smal ta ser resolvi na un manera mucho mas economico door di expande esaki cu un di tres via, cu mainta ta ser usa door di e trafico bayendo e ciudad, mientras cu despues di merdia e ta ser usa door di e trafico saliendo for di e ciudad.
Pero scucha awor e mas bunita!

Ki un coincidencia!
Abogado Fat ta bisa cu na momento cu e tabata scirbi su remetido, e no tabata dispone di e cifranan exacto, pero cu e gastonan anual pa e uso di tanto e Green Corridor como e Ringweg ta monta na alrededor di 22 miyon pa cada proyecto, y esaki durante 18 aña.
Tabata un casualidad cu e no tabatin e cifranan ey??
Hecho ta cu e Green Corridor riba su mes so ya ta costa e pagador di impuesto 30miyon florin pa aña durante 25 aña, pues un total di 750miyon florin!
Esey ta algo completamente diferente na locual Fat ta pretende y kier pa hende kere, y esaki semper ta mesun storia cu e gobierno Eman: NO ta papia nunca di e prijsnan y di e gastonan; wak por ehempel tambe e prijsnan di energia alternativa nobo: nunca bo ta haya tende kiko e tarifanan lo bay ta!
Pakiko un projecto di cerca di 297miyon florin mester bay costa 750miyon, bo mes mag di rei!
Gobierno mester haci mescos cu locual cada manager di un compania ta haci pa respet pa esun di kende e ta usa su placa, y esey ta ser completamente transparente y habri, manda copia di tur contract y purchase orders numera pa e doño, of - den e caso aki di Pais Aruba – pa tur lider di fraccion di e partidonan politico den parlamento, y ser totalmente habri y honesto den e maneho.
Y como cu gobierno Eman nunca ta haci esey, e ta expone su mes na dudanan y sospechanan, y ta duna contenido na tur locual nos ta scucha for di circulonan di gobierno y contratistanan y otro “insiders” encuanto e destahonan sumamente dudoso di e proyectonan PPP aki.
Na lugar di ta transparente y di duna splicacionnan publico, Eman ta encarga abogado Fat y Marjan Havelaar pa esakinan siña Prensa un les cu gritonan barata y sin ningun argumento.
E hecho cu e contratistanan en cuestion finalmente ta ser permiti pa importa trahadornan barata (“cheap labor”) for di exterior, na lugar di stimula nos economia door di duna e trabao aki na Arubianonan, unicamente ta empeora e hechonan menciona anteriormente!

Jan de Ruijter
Voorzitter Nos Ta Aruba
E: This email address is being protected from spambots. You need JavaScript enabled to view it.
december 22, 2014

Expresionnan haci den e articulo aki no necesariamente ta refleha opinion di ArenaPoliti.co