Mescos cu puntonan presenta pa demas ministernan 

Minister Otmar Oduber, relaciona cu e situacion di e impasse cu tabatin den Gabinete Mike Eman II, relaciona cu varios punto di atencion cu el a presenta den un carta na Gobiernador a indica cu varios reunion a tuma luga unda a hiba hopi combersacion cu un ekipo cu pa e ultimo 6 añanan a traha hopi duro pa e pais aki y tur dia a traha riba mehoracion di calidad di bida di cada un di nos ciudadanonan. E mandatario a bisa cu a yega  un momento den bida, cu "por ta cierto preocupacionnan grandi ta biba netamente pa continua cu e trabou aki y esey ta loke a bin afo na momento cu a bishita señor Gobernador, pero esakinan no ta kita for di e liña cu pa 6 aña largo nos a traha hopi duro."

Minister Oduber ta kere cu despues di e combersacionnan, e atencion cu tabata wordo busca a haye tambe. "Ma reuni diahuebs cu mi coleganan minister de Meza y Sevinger  y tambe cu lider di fraccion.  Diasabra nos a bolbe sinta como Minister Raad completo y despues ainda dialuna mainta ma sinta cu fraccion pa delibera e puntonan cu como Minister a sali afo y a pidi atencion necesario p'e."

El a bisa tambe cu tin biaha ora cu hopi trabou ta tuma luga kisas e concentracion no ta riba e puntonan cu a trece dilanti y den e simannan cu a pasa a sinta, a reflexiona y a combersa te hasta riba e rumbo di e organisacion politico. " Lo cual a tuma luga den e ultimo 2 simannan ta un reflexion riba un trabou grandi cu a wordo haci pa 6 aña, mira con ta continua cu un base amplio, si tin un confiansa pa continua y si e idealnan pa cada un como politico cu ta forma parti di un organisacion por mira nos hunto como base di e idealismo aki. Despues di e combersacionnan a reconfirma como organisacion politico, como profesionalnan cu nos tin un meta cu nos tin cu caba di cumpli cu ne. Ta e meta ey nos a pone nos dilanti."

Minister President Eman a duna Minister Oduber tur atencion pa tur e puntonan fundamental unda a realisa cu cada un minister den nan forma tin esakinan como prioridad. E mandatario a bisa:"Caminda ta traha semper por tin momentonan cu un rato ta bay for di ruta, pero mester sinta hunto papia riba tur e puntonan y a te hasta pone accion tras di cada uno.  Den e siguiente Conseho di Minister lo firma e accionnan aki y otro puntonan. No ta puntonan di Otmar so pero a bin mas punto cu awor nos ta percura pa formalisa den un base solido como un prioridad pa maneho di nos pais pa e proximo dos añanan."

E siman aki ta inicia un proceso hopi importante unda cu hunto a sali fortaleci, un ekipo fuerte cu un pensamento pa guia e pais aki manera cu semper partido di pueblo AVP a sa di haci. "Awe, mi por bisa cu mi ta mas orguyoso cu nunca di e Gobierno aki, mas orguyoso cu nunca di e partido cu ma scoge pa inicia mi carera politico y den cuadro di e confiansa, e base cu a wordo poni durante e ultimo simannan aki, tin tur e intencion di mundo pa por cumpli cu loke nos votadornan y ciudadanonan ta pidi y ta lo cual nos ta bay haci como un ekipo."

Expresionnan haci den e articulo aki no necesariamente ta refleha opinion di ArenaPoliti.co