ORANJESTAD -- Parlamento a cuminsa trata e presupuesto pa 2016, y Lider di MEP a cuminsa cu un refleccion tocante e realidad nobo di curatela financiero cu tin na Aruba desde 27 augustus 2015. 
El'a ripiti cu 27 augustus tabata un dia scur den historia di nos pais, den cual nos a perde nos autonomia financiero debi na mal maneho di Gabinete Mike Eman cu a redobla nos debe. Pero tambe debi cu Mike Eman a bai hasi palabracionnan cu Hulanda, voluntariamente, y no por a cumpli cu nan. Mike Eman mes a skibi den e memorie van toelichting riba pagina 1, cu e mes a pidi e curatela financiero.
Mas alew lider di MEP a reflecciona riba e dia scur di 27 di augustus pasobra e presidente di parlamento a dal porta di parlamento sera pa pueblo, ora pueblo a pidi pa wordo scucha. El'a enganja pueblo cu lo wordo scucha prome cu votacion, pero no a cumpli. Y ora cos a sali for di man pasobra pueblo a sintie enganja, a manda polis tira riba manifestantenan, y manda hendenan bin intimida parlamentarionan den sala di parlamento.  
"Boso a kibra nos Status Aparte y pueblo a lanta riba boso y esnan cu a kibra algun glas di e edificio di parlamento ainda ta wordo persigi, pero esunnan cu a kibra Aruba su Status Aparte mes ta liber", segun lider di MEP.
Sra. Wever-Croes a puntra gobierno kiko ta e status di e investigacion y si ta berdad cu minister Dowers a duna instruccion pa tapa locual a socede. Tambe sra. Wever-Croes loer saki dia parlamento ta haya sa cual ta e agentenan policial cu a tira riba e manifestantenan y riba orden di ken, y tambe kennan ta esnan cu a intimida parlamentarionan den sala di parlamento y riba orden di ken.
"Y mi kier referi na e discurso di anja nobo di Gobernador sr. Refunjol cu e berdad MESTER sali na cla pa algo asina hamas bolbe sucede!" 
Ayera nos a celebra Dia di Betico, y manera Betico mes a bisa, ta e y partido Movimiento Electoral di Pueblo a salba HONOR y DIGNIDAD di nos pueblo, y lamentablemente awor e HONOR y DIGNIDAD di nos pueblo a wordo herida.

Segun e lider di MEP e tratamento di presupuesto ta un farsa pasobra Parlamento no tin ultimo palabra, ni gobernador tampoco, pasobra segun art. 11 di ley di supervision financiero, parlamento no tin nada di bisa, y gobernador tampoco. Y esey ta optima forma di curatela, e realidad nobo danki na e fracaso di gabinete Mike Eman
"Esaki naturalmente ta hopi tristo, pasobra Aruba ta un pueblo orguyoso, pero a toca e pueblo aki e malasuerte di mal maneho di Gab Mike Eman", Evelyn Wever-Croes a duna di conoce.

Expresionnan haci den e articulo aki no necesariamente ta refleha opinion di ArenaPoliti.co