Minister di Turismo Otmar Oduber a indica cu no ta un secreto cu tin un situacion di transformacion pa loke ta trata e forma cu bishitantenan ta acomoda. Esaki no ta mescos cu antes cu semper tabata keda na hotel, e parti di acomodacion ta sigui amplia y turistanan no ta kedando solamente na hotel, no solamente na Aruba pero rond mundo. Cada bes mas por mira otro tipo di acomodacionnan manera casnan cu ta wordo gehuur, condominionan y apartamentonan.
E mandatario a indica cu e aña aki lo bay reuni mas cu e hotelnan unda cu lo mester ta mas progesivo y pone retonan pa nan mes pa enfrenta e tendencia mundial aki. E ta bisa cu dor di e maneho cu tabatin di moratorio di hotel, es decir, ta e mesun hotelnan existente, a diferencia di competidornan den Caribe cu tur aña ta habri miles y miles di camber di hotel nobo. “hotelnan mester bay challenge nan mes, nan mester bira hopi mas inventivo den e forma cu ta bay atrae nos clientenan pa asina e hotelnan tambe keda competi cu tur e otro acomodacionnan cu nos ta mira ta lantando rond di Aruba”.
Minister Oduber ta bisa si cu e tendencia aki no kiermen cu nos turismo ta malo of cu e ta bayendo atras, al contrario, por a mira den e presentacion durante e reunion di e comite di mercado di Norte America cu tin un shift den e grupo afluente. E grupo super afluente cu ta bishitantenan cu entradanan riba 150 mil Dollar a crece y na e momentonan aki e ta representa un 25% di e total di bishitantenan for di Merca, compara cu 7% na 2012.
Esaki ta demostra cu e tendencia ta positivo ta bayendo segun e planificacion y strategia cu tin pa haya e hendenan cu tin mas posibilidad di por gasta na Aruba, pero esaki no ta significa cu hotelnan mester keda para caminda nan ta. “Mi ta kere nos mester bay conhuntamente como destinacion Aruba mira con nos ta bay influencia nos mes pa haci nos mes mas challenging”. E strategia aki ta necesario pa por drenta mercadonan nobo, target mercadonan nobo y no keda unicamente riba e famia, e honeymooners of esun cu ta bin casa, pero por ehempel cuminsa wak con por habri e segmento di salud y bienestar, esun di deporte y otro gruponan pa por atrae e hendenan cu ta dispuesto pa gasta riba nos isla.
Durante e reunion di diaranson hunto cu e diferente teamnan di Norte America precisamente a purba di influencia mas ainda e forma di opera di hotelnan na Aruba y esaki lo wordo haci mas activo den e aña aki pasobra e reto ta bira grandi.

Expresionnan haci den e articulo aki no necesariamente ta refleha opinion di ArenaPoliti.co