Ta apenas siman pasa cu UPP a haci un apelacion na nos Parlamento pa tuma henter e asunto di e posibel reapertura di e refineria mas na serio, enbes di ta pleitando ta ken su merito esaki ta. Siman ta habri cu e noticia - hasta nos por bisa noticia internacional - cu e refineria na Aruba lo habri, pero no den su forma completo, sino parcial.

Riba su mes esaki no mester ta un desaster, ya cu importante ta pa bolbe tin actividadnan industrial cu por genera trabou pa nos pueblo y entrada pa pais Aruba.

Pero si ta preocupante pa mira, cu apesar cu ta wordo papia bunita di e posibel reapertura, no tin e transparencia necesario tocante e negosacionnan cu ta andando.
Minister de Meza ta papia bunita durante reunion di Parlamento, pero toch falta e claridadnan necesario.

Nos di UPP a urgi na Parlamento tambe pa trata e asunto di refineria cu mas seriedad y diligencia.
Nos a mustra ariba aspectonan importante di un posibel deal cu Citgo, manera e parti socio-economico, laboral, financiero pa Aruba, salubridad, ambiental, huridico, y di interes general di pais Aruba.
Asina aki fin di siman ainda partido UPP a haci entrega di un peticion na tanto Parlamento como Gobierno pa percura pa e facilidadnan di benta di combustibel y tambe e transhipment pasa pa pais Aruba y keda tambe como compania estatal.
E ganashi genera aki lo mester bay den un fondo nacional destina pa enseñanza, cu e meta pa mehora, inova, desaroya y haci nos sistema di educacion acesibel pa henter nos comunidad na un forma barata, pa no bisa gratis.

Nos a urgi na Parlamento pa atende di tempran cu gobierno e “settlement agreement” cu lo bay tin atrobe, e biaha aki cu Citgo y manera ta mustra cu Valero tambe. Di e manera cu for di tempran, si realmente e interes di pueblo ta conta pa nos Parlamento, esakinan ta wordo sirbi na prome lugar.

Ta imposibel kere cu gobierno di Aruba ta deal un semehante acuerdo cu Valero particularmente. Ta inaceptabel cu bo ta libera Valero di tur claim ambiental posibel, y di otro banda Valero ta para riba cu e ta keda cu e facilidadnan di transhipment.
UPP ta totalmente contra di esaki.
E pregunta ta surgi atrobe: ken a priminti ken kico y a cambio di kico?
Cada dia nos ta puntra nos mes si realmente e reapertura aki lo beneficia pueblo directamente, si nos mira con ta negocia!
Incluso nos a atende riba e hecho cu parce cu ya caba a cuminsa recluta hende pa bin traha na Aruba.
Na unda nos mesun trahadonan a keda?


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, februari 16, 2016

Expresionnan haci den e articulo aki no necesariamente ta refleha opinion di ArenaPoliti.co