Compitiendo cu ‘monsternan’den e industria di mercadeo. 

Despues di un biahe di trabou fructifero pa New York, Minister Otmar Oduber a topa cu prensa pa comenta riba e diferente aspectonan cu a atende cu nan durante su bishita e siman aki na Merca. 

E prome ta e alegria grandi na momento cu Aruba un biaha mas ta destaca y logra premiacionnan importante den e mundo di hospitalidad. E organisacion HSMAI (Hospitality Sales and Marketing Association International) a duna Aruba dos premio. E prome premio ta un Silver Award pa loke ta trata e mercadeo digital cu tabata e ‘Hapiness Builder’. E otro premio ta e Gold Award pa loke ta trata promocion y tabata e ‘One Happy Selfie’. Durante e evento a bin un sorpresa hopi grandi y cu ta un reconocemento pa e trabou duro cu a wordo haci pa Oficina di Turismo na Norte America, nos compania eynan di promocion,The Concept Farm,  y tambe henter e team di ATA na Aruba hunto cu otro partnernan. Aruba a logra e premio maximo di Platinum Award.

Minister Oduber y Sr. Ed Malone tabatin e honor di ricibi e premio aki cu ta uno hopi importante den un industria cu ta midi e aspecto di promocion, mercadeo y PR hopi mes. Cu Aruba, un isla asina chikito por a competi cu otro destinacionnan cu tin budgetnan hopi mas grandi cu esun di nos, companianan grandi y e ‘monsternan’den e industria aki, ta algo grandi, pero cu nos a logra e premio maximo ta algo hopi mas grandi.

Minister Otmar Oduber a bisa cu esaki ta un refleho di e trabou grandi cu ta wordo haci, particularmente den e cambio di maneho cu tabatin, den e forma di haci promocion na Merca.

E premionan aki ta bon riba un otro cantidad di reconocementonan cu no solamente Oficina di Turismo ta ricibi, pero tambe otro instancianan priva den sector di turismo ta ricibiendo.

“Pa Aruba, fuera di un tremendo aña 2015 cu e cifranan tambe ta demostra esaki, por a mira cu e reconocemento internacional a tuma lugar cu e premio aki, Platinum, pa loke ta trata advertisement for di e instancia asina renombra cu practicamente e premiacion aki por wordo compara cu un Grammy of Oscar. Hopi, hopi pabien na tur esnan cu a contribui cu esaki y pami tabata un honor pa den nomber di pueblo di Aruba por a ricibi esaki”.

Expresionnan haci den e articulo aki no necesariamente ta refleha opinion di ArenaPoliti.co