Gabinete ME II: Prome Minister Eman den Bario di Sabana Liber
Habitantenan contento cu desaroyo grandi cu Noord a conoce ultimo añanan
ORANJESTAD - "Tur mainta y anochi mi ta reza pa bo Prome Minister, pa bo tin e forsa pa sigui cu e trabou bon cu bo persona y bo Ministernan ta haci pa pais Aruba," tabata palabranan expresa pa sra. Francisca Farro, di Sabana Liber, kende a habri portanan di su cas pa ricibi e mandatario y su team di colaboradornan cu tabata den su bario diahuebs ultimo. Durante Accion di Bario Prome Minister Mike Eman scucha e preocupacion y sugerencia di ciudadanonan pa mehoracion di nan bario, pero tambe di Aruba en general.
Esaki tabata e di dos bishita di e mandatario na Sabana Liber, manera el a splica, unda tin un area cu a wordo desaroya caba mientras cu un otro parti ainda falta iluminacion y camindanan cu mester wordo asfalta. E ultimo aki sinembargo no ta loke tin e habitantenan preocupa. Mas bien nan petición tabata pa mas iluminacion "ora cu ta posibel" y ta masha agradecido pa e desaroyo cu bario di Noord a conoce ultimo añanan. "Nos ta hopi contento cu e desaroyo y cu tur loke nos a haya," sra. Etline Dijkhoff a expresa. E unico sugerencia tabata si Gobierno por pone un poco masi iluminacion pa di e forma aki nan sinti nan mes un tiki mas sigur. Pa famia Dijkhoff tabata un alegria e hecho cu Prome Minister Eman a yega cas di sorpresa. "E tabata un sorpresa, mi no a sper'e. Ta manera un omo grandi, un familiar, a yega di bishita." Tambe e ciudadano tabatin hopi bon comentario pa e desaroyo na Noord, principalmente cu yegada di e edificio Multifuncional, MFA, den cual diferente servicio ta wordo brinda mas cerca den e distrito. "Noord a progresa hopi, masha poco mi ta bay Playa awo. Solamente mi ta bay de bes en cuando pa keiro. Pa mi pagonan, mi ta bay na MFA Noord mes." E edificio nobo, el a splica, ta un diferencia grandi cu e Oficina Auxiliar anterior. "Esaki ta uno hopi mas comodo y e tabata un necesidad principalmente pa e hendenan grandi. Nos ta hopi contento cu esaki," sra. Irena Dijkhoff a bisa cu un sonrisa grandi riba su cara.
Tur e habitantenan bishita a expresa cu nan ta contento cu e trabou cu a wordo haci bou di e gobernacion actual, unda a keda resalta proyectonan cu a wordo ehecuta na bienestar di pueblo. Pa mira e mandatario bishitando barionan tambe "ta un honor grandi", Johanita Farro a comenta despues di a papia cu ne brevemente y a expresa na dje cu e ta contento cu e trabou cu e ta haci pa pueblo. "Esun cu Dios duna su fortaleza no tin hende pa kibre," el a expresa.
Prome Minister Mike Eman a finalisa su bishita den e bario aki na cas di sra. Francisca Farro, kende a expresa un alegria grandi cu e mandatario a scoge su cas como e punto pa finalisa su bishita y duna su declaracion hunto cu Edwin Gomez, kende a compaña e mandatario den e bishita na Sabana Liber.
Sabana Liber ta un bario hopi limpi, ta loke e mandatario a constata y a expresa gradicimento pa esaki na e habitantenan. Esaki y e hecho cu e ciudadanonan ta coopera pa haci un diferencia den e bario, unda cu por ehempel. limpiesa ta resalta, ta ehempel cu otro barionan mester tuma.
E mandatario den su bishita di bario semper ta wordo compaña pa funcionarionan di SERLIMAR y GKMB, pero e ultimonan aki no tabata presente comokiera cu nan a pasa diaranson caba den e bario. Esaki como parti di e campaña nacional cu Gabinete Mike Eman II a bini cune pa conscientisa ciudadanonan riba prevencion di sanguranan cu ta causa e virusnan di Zika, Dengue y Chinkingunya.
Tambe e mandatario tabatin bon noticia pa e bario cu yegada di un cantidad grandi, rond di 3 mil, luznan nobo. "Nos a haci peticion pa 12 mil luz led nobo di cual 9 mil ta pa reemplasa e bieunan y 3 mil ta pa puntonan nobo den barionan manera Sabana Liber unda cu ainda tin areanan scur. Nos ta spera cu pa mey-mey di aña nos por cumpli cu e deseo aki di e habitantenan di e bario aki," e mandatario a expresa na final di su bishita.
Expresionnan haci den e articulo aki no necesariamente ta refleha opinion di ArenaPoliti.co