Aruba ta na punto di celebra e 30 aña di su Status Aparte. Nos partido blanco sinembargo no ta mira ningun motibo pa fiesta, sino mas bien mester keda declara un dia di luto. Aruba no a logra madura como pais democratico y un generacion a bai perdi. A institui dos tradicion peligroso pa nos democracia, esta cu pa hopi aña ta un partido politico so ta goberna y ta hasi y deshasi, y e partido gobernante ta impone su minister como gobernador.

No ta nada personal contra mr. Angel Bermudez, pero ta trata di un minister actual di e Gabinete Mike Eman. Si algo ta caracterisa un minister ta cu e ta parti di un conseho di minister, y maske cu e no ta di acuerdo cu cierto decisionnan di e conseho di minister, e tin cu baha cabes pa tur decision y mantene secrecia di tur decision, a menos cu e entrega su retiro. Den e caso aki sr. Bermudez no a entrega su retiro sino ta pasa di minister pa gobernador. Kier men e ta complice di tur decision di mal gobernacion di Gabinete Mike Eman y riba dje e ta bai bira un instancia cu mester controla Gabinete Mike Eman, ya cu e 'waarborgfunctie' ta esencial den e funcion di gobernador.

Kiko tin di celebra? Nada. E clase trahador a bai atras, nos trahadornan arubiano tabata miho para prome cu despues di status aparte. Prome cu 1986 e capacidad di compra di e trahador arubiano tabata mas cu dobel di loke e trahador ta gana actualmente. Aruba na 1986 a cuminza e fase nobo sin debe nacional, y awe e pueblo tin riba su lomba un debe biyonario impagabel. Ya den e proceso pa status aparte e cartelnan colombiano tabata presente, y despues nan a haya control di nos sistema. Den e prome gabinete Eman caba tambe e mafia italiano, cu vinculo estrecho cu un famia di origen libanes na Aruba, a haya poder di decision. Pero na Aruba nos ministerio publico no ta manera esun na Curaçao of St. Maarten cu si ta persigui of procede contra e mafia italiano, sino mas bien ta haci deal riba beach manera den e caso di Fondo Desaroyo Nobo San Nicolas pa scapa peyeho di cierto politiconan.

No, nos no tin nada pa celebra. Awe na 2016 nos ta den mesun situacion cu tempo di Wathey Vos y di Interbank. Droga di e crimen organisa ta spula bin Aruba na gran cantidad, Aruba a keda un lugar di contrabanda por excelencia di e crimen organisa internacional. E cantidad di kilo di cocaina cu ta pasa via Aruba ta keda refleha den e bultonan cu Wardacosta den ultimo tempo ta gara y ta mas bien un acto simbolico. Nos ta carga e speransa cu Conseho di Reino lo blokea e nombracion di mr. Angel Bermudez como gobernador di Aruba, aunke e por ta un speransa falso. No solamente e pueblo votador di Aruba no ta castiga e politico corupto, sino Hulanda tambe ta complice di mal gobernacion na Aruba. Henter e teatro di Cft a caba na nada y a bira otro instancia di para duna aplauso na mal gobernacion.

Expresionnan haci den e articulo aki no necesariamente ta refleha opinion di ArenaPoliti.co