Den su rueda di prensa semanal, e lider di Partido Democracia Real Andin Bikker, a cuminsa pa bisa cu gobierno a gana loteria di fin di aña y ta haci comosifuera ta su maneho financiero tabata bon na 2015.
El a bisa cu siman pasa CAFT a saca un carta, riba dia 4 di mart 2015, cu cierto puntonan, nan ta refleha y trece conclusionnan riba e presupuesto 2015.
Segun Bikker gobierno a core bay celebra comosifuera e ta un tremendo “pluimpje” nan a haya haya pero e realidad ta otro.
Riba pagina dos, CAFT ta splica cu ta dos factor tin. E hecho cu SVb a pordona gobierno un debe di 60 miyon, y e sistema nobo di cobra winstbelasting cu mester paga ora di duna e aangifting.
Esaki ta e dos factornan cu a contribui cu gobierno di carambola a keda dentro di e margen cu e mester keda a base di CAFT.
Segun Bikker ta awacero a paga e candela. Pasobra door cu awa a yobe e candela a paga, manera un dicho crioyo ta bisa.
Gobierno ta keda insisti cu el a haya un tremendo logro pero den pagina 4 CAFT ta aclarea esaki. Bikker a lesa textualmente: “Tegelijkertijd blijkt dat de realisatie op de posten die wel in de begrotingswijziging waren opgenomen relatief achter zijn gebleven”. Treci dilanti na Papiamento Crioyo  kiermen “cu atrobe gobierno a entrega parcialmente un presupuesto cu no ta cuadra completamente cu realidad”, door di a pone cierto entradanan cu no ta cuadra cu loke a wordo presupuesta.
Bikker a sigui lesa kico e carta ta bisa: “De realisatie van het financieringstekort in 2015 is derhalve niet in de eerste plaats te danken aan doelmatig beleid of consciencentieuze keuzes van Aruba om zijn uitgaven te verlagen, maar meer aan niet structurele factoren aan de middelenkant”.
Bikker a bisa cu atrobe na Papiamento crioyo bisa, e hecho cu a logra contene e deficit na aña 2015, no ta danki na un maneho efectivo of scogencianan prudente di Gobierno, pa controla gasto pero mas bien pa entradanan inespera. Kiermen cu awa a yobe ye cosecha a scapa.
Andin Bikker a splica cu gobierno ta keda insisti cu ta algo grandi nan a logra, si ta asina su pregunta pa gobierno ta si cos  ta asina bon, di con tin CFT?
E lider di PDR a bisa cu e presupuesto aña tras di aña no ta realistico y cu Hulanda a constata esaki, y si nos tabata tin un democracia sano ya gobierno mester a saca su conclusion, pasobra den apenas cuater aña a redobla e debe, a hipoteca e futuro generacionnan, y aworaki cada bez cu nan haya algo di CFT cu nan por interpreta como positivo, boter di champagne ta habri.
Andin Bikker ta puntra atrobe con un gobierno cu a pone Aruba den un situacion financiero asina penoso, casi hibe den bancarota, por pretende cu e ta bay salbe.
E ta puntra cu si e situacion ta bon, con a bin CAFT? Con bin a aumenta BBO-BAZV? Con bin a hisa edad di pension? Con bin awor ta cobrando e pueblo pa recoge sushi? Con bin tin parkeermeter cu a wordo introduci supuestamente pa reglamenta con pa parkeer den caya pero na final di dia ta pa genera entrada, y den e proceso a bay di gana 10 cen y perde dos florin, pasobra comercio a bisa cu nan ta perde trinta porciento di nan entrada, pasobra eynan ta perde entradanan di gobierno indirectamente y directamente.
Segun Bikker basicamente e gobierno aki a hiba un mal maneho financiero tur e añanan aki, CAFT a cay aden, a bin un KB, anto aworaki gobierno tin e poder di bin pretende cu e carta di siman pasa di CFT, lo ta un tremendo “pluimpje” pe.
Segun Bikker gobierno mester cuminsa realiza y admiti cu nan a hiba un maneho financiero desastroso, cu a hiba nos pais na e rand di bancarota, cu a wordo impone riba dje un CAFT door di un presupuesto irealistico, y un hala di medida a bin a base di esey. Hecho ta cu gobierno awor no por pretende cu cos ta bon. Segun Andin Bikker ora cos ta bon ta ora tin surplus y no tin debe nacional pero no ora e debe nacional ta asina halto cu si no ta pa Reino Hulandes no por yega ni New York pa por fia placa, y no por papia cu cos ta bon ora gobierno ta clabando nos hendenan constantemente cu medida, cu nan duna nan otro nomber.

Expresionnan haci den e articulo aki no necesariamente ta refleha opinion di ArenaPoliti.co