ORANJESTAD -- Cu un stem hopi tembloroso minister Otmar Oduber a wordo cuestiona pa prensa den su conferencia di prensa. No solamente e stem tabata tembloroso, sino e minister a recuri na cantidad di mentira pa defende su mes. Y ora e no por a ganja mas, el'a cuminsa menasa y ofende hende.
Locual ta remarcable ta cu Otmar Oduber a ganja cu e ta e prome minister cu a percura pa un surplus den ATA. Esey ta un mentira. E unico cu a laga perdida den ATA tabata gobierno di Henny Eman te cu 2001. Ta MEP mester a drecha tur e desastre cu Tico Croes hunto cu Otmar Oduber e tempo ey a laga den ATA.
Ademas, e minister ta bastante sinberguensa di gaba cu e tin reserva den ATA. Pasobra e ta suta pueblo cu medida. Minister di ensenjansa no tin placa pa ensenjansa. Minister di salubridad no tin placa pa salubridad. Minister di husticia no tin placa pa combati criminalidad. Pero minister Otmar Oduber si a crea reserva den ATA. Esey ta un abuso marca mayor!
Otmar Oduber kiermeen cu ex minister Eddie Briesen a perde e caso di film festival den Corte. E ta ganja! Edison Briesen a wordo absolve den Corte, pues hues a duna Edison Briesen rason.
Otmar Oduber a ganja cu e ta manda tur informacion pa Parlamento. Den parlamento tur ora fraccion di MEP mester roga, zundra, exigi, menasa pa haya informacion, pero NUNCA e minister ta duna informacion. Y nunca e presidente di Parlamentonan a mustra weso di lomba pa exigi e informacion y a complase cu Otmar Oduber pa e no ta transparente.
Asina tin cantidad di mentira mas cu Otmar Oduber a recuri na dje ora ya e no por a defende su mes. Su actuacion tabata un falta di respet, miedoso, cobarde cu stem temboloroso mustrando cu e tin hopi cos di sconde.
Un cos si cu a resalta ta cuanto 'deal' Otmar Oduber a duna su gran amigo Ralf Maduro. No ta bai pa e persona di Maduro, pasobra e no ta politico, pero Otmar Oduber a subraya cuanto 'deal' Ralf Maduro ta hayando. Tambe cuanto gasto di ATA e minister ta usa pa e por biaha y fiesta.
Pero e pregunta cardinal mes no a keda contesta: cuanto Arubadag na Hulanda a costa e pueblo di Aruba. E pregunta ey Otmar Oduber MESTER contesta!
E por menasa, e por ofende, e por bai Corte of e por yora mes, pero na final di dia e mester contesta!

Expresionnan haci den e articulo aki no necesariamente ta refleha opinion di ArenaPoliti.co