STA CRUZ -- Evelyn Wever-Croes, lider di MEP den conferencia di prensa di MEP dia 30 di maart ultimo a expresa su preocupacion pa cu e negosacionnan entre gobierno di Mike Eman y Citgo.
"E falta di transparencia di parti di gabinete Mike Eman entorno e deal cu Citgo tin nos hopi preocupa. Gobierno ta demasiado keto, y nan no ta duna informacion. Nan a bin Parlamento duna mitar informacion, y mientras tanto e fecha ta yegando y nos no sa unda nos ta para.
Preguntanan cu nos kier hasi ta: gobierno di Mike Eman ta negoshando di berdad? E deal cu nan ta negoshando ta den bienestar di Aruba? Ta tene cuenta suficientemente cu aspectonan di medio ambiente? Ta tene cuenta suficientemente cu aspectonan di seguridad di trabou? Ta tene cuenta suficientemente cu aspectonan di fair-share? Ta tene cuenta suficientemente cu ken lo haya trabou? Pasobra, si bo mira e forma asina scondi cu nan ta hasiendo, ta ponebo pensa cu nan tin hopi di sconde.

Locual cu nos kier evita ta pa yega 1 di april y nan bin Parlamento y nan bisa cu nan no a logrsa yega na un deal, sin cu nan a tene Parlamento na altura di esey. Of pa nan bin cu un deal cla caba y bisa Parlamento djis guli y manda abou. Ningun di dos caso ta combini pueblo di Aruba.
Nos ta scuchando tambe cu tin hende den e comsicion negociador cu no kier mira e refineria habri, y nos lo no tolera esaki.

CITGO-DESK
Mi a tuma nota cu ya tin ministernan caba cu kier bai dicidi ta ken ta haya trabou den Citgo. Esaki ta algo nunca antes visto, pasobra no ta normal cu un gobierno ta bai dicidi ken ta haya trabou den un compania priva, y nos no kier pa nan usa esaki pa finnan politico.

Pesey nos ta spera cu gobierno por bin duna cuenta di e deal aki. Nos kier sa si nan ta poniendo e pueblo na prome lugar of si nan ta reglando contractnan pa nan mes na prome lugar. Nos kier sa con nos ta bai hasi cu e claim ambiental, pasobra si ta nos mes ta bai cumpra e refineria y nos tin cu paga pa e limpiesa, ta con nos ta bai hasi esey? Nos kier sa den e operacion di e refineria, con ta bai tene cuenta cu medio ambiente. Nos kier sa con ta bai tene cuenta cu trahadornan y salarionan pa trahadornan. Nos tin hopi pregunta, y nos ta spera cu gobierno bin Parlamento pronto.

REUNION DEN PARLAMENTO
Fraccion di MEP a hasi un peticion pa un reunion publico riba e tema di e refineria basta tempo pasa caba, pero ainda e reunion no a wordo yama. Gobierno no mester kere cu e tin un "carte blanche" pa hasi kiko cu kier, con cu ta y cu ken cu ta. Gobierno mester tene cuenta cu e mester busca sosten den Parlamento pa cu esaki" Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co