Proyectonan drumi den lachi pa decadanan awor ta cla of den ehecucion. 

ORANJESTAD - Pa decadanan largo proyecto of miho bisa ideanan a drumi den lachi ta coy stof den oficinanan di gobierno. E ideanan tatat'ey, pero nunca a yega na nan realisacion. Proyectonan cu ta necesario pa desaroyo economico y social di e Pais Aruba. Proyectonan cu a keda pa añanan largo den e lachi di olvido. Te ora un gobierno determina a bin y a cuminsa realisa nan.

Proyecto di hospital ta un di nan. Pa añanan a papia pa construi un hospital mas grandi mirando cu poblacion di Aruba a crece considerablemente despues cu dr. Horacio Oduber Hospital a keda cla na 1976, casi 40 aña pasa. Pa e tempo ey un hospital moderno, pero cu den transcurso di tempo no por sibri su propositonan mas. Awe e hospital ta den pleno renobacion y ampliacion. E hospital nobo ta bira un facilidad moderno cu tecnologianan moderno pa por ofrece un servicio di calidad na e pueblo di Aruba. Un plan cu tabata drumi den e lachi di olvido, cu tabata wordo saca den bes en cuando y poni bek pasobra e tabata costa demasiado trabou, determinacion, curashi y esfuerso pa traha riba dje. Gabinete Mike Eman a sak'e di lachi, a cumpli, no a papia pero a haci.

Mudamento di waf di container pa Barcadera. Un plan ambicioso cu tabata drumi den lachi di olvido for di añanan sesenta of podise hasta mas ainda. Algun siman pasa e proyecto a keda cla y ya caba e waf ta trahando manera mester ta cu ayudo di hendenan cu vision. E waf crucero na Playa ta wordo desaroya awor y aki algun tempo e ta full desaroya y un otro bunita proyecto ta keda cla, na bienestar di turismo crucero y comunidad di Aruba. Ora otronan a tira e proyecto bek den e lachi di olvido, Gabinete Mike Eman a sak'e afo, a traha riba dje y su realisacion ta bisto.

Proyecto Green Corridor. Mirando e trafico pisa na Aruba, un vierbaansweg ta necesario. Un proyecto cu pa decadanan ta papia di dje. Gobiernonan prome a pensa pa lag'e pasa den cunucu, pero mirando cu esey no ta bon pa naturalesa, a discuti, pensa y yega na un bon idea unda ta laga e cunucu intacto y construi un caminda di cuatro via unda e trafico ta sigur. Financiamento semper pa otro gobiernonan tabata un punto di discusion. Gabinete Mike Eman a introduci na Aruba e sistema PPP (Public Private Partnership) cu ta construi y mantene e proyecto y despues di hopi aña ta paga e inversion bek. Otronan a laga e proyecto grandi aki drumi te pega soño profundo den lachi, e gobierno actual a sak'e, a traha riba dje y no lo duro mucho prome e keda cla.

Ringweg y Avenida Watty Vos, otro proyectonan cu tambe tabata den e mesun lachi y awe ta hayando a atencion necesario y ta trahando riba nan realisacion. Esakinan ta proyectonan grandi y den e area di construccion, pero tin otro proyecto cu ta bon pa Aruba y necesario cu nunca a keda realisa pa falta di curashi y determinacion. Tur hende tabata convenci cu e hubentud di Aruba cu tabata bayendo e caminda robes pa motibo di falta di scol y tin bes disciplina, mester a haya un di dos oportunidad, pero ningun gobierno a traha riba dje. Awe Gabinete Mike Eman cu hopi orguyo por presenta hobennan cu door di e programa SVT ta ciudadanonan ehemplar den nos comunidad. E lista ta largo...unda otronan ta papia so, Gabinete Mike Eman ta traha y cumpli.

Expresionnan haci den e articulo aki no necesariamente ta refleha opinion di ArenaPoliti.co