Lider di MEP Evelyn Wever-Croes y su coleganan parlamentario e siman aki a tene conferencia di prensa na Boca Catalina. 

"Awe nos a trese prensa na e lugar aki, pa asina enfatisa cu e pida naturalesa aki ta di pueblo di Aruba y ningun mandatario tin derecho di regala terenonan aki na campanjadornan. Dia e noticia a sali cu gobierno a cuminsa cu plan pa parti e terenonan na Boca Catalina y Malmok, ta hopi hende a protesta. Ya e verkaveling a tuma lugar, y ta danki cu e noticia a wordo publica, e plan pa parti a wordo para un rato. Cuidadanonan di Aruba ta cansa di tanto fiestamento cu tereno, anto tur den man di un solo famia yega na Mike Eman. 

Y mi ta puntra mi mes, unda Mike Eman mes ta? Gruponan ta lanta pa demanda miho cuido medico, ora nan mira sernan keri muri siendo cu por a hasi mas. Gruponan ta lanta pa demanda pa cambia leynan pa combati abuso sexual di muchanan. Pueblo ta pidi mas proteccion, pasobra nos ta biba den inseguridad grandisimo y fin di siman no tabata un excepcion. Pueblo ta demanda pa para e fiestamento di tereno, pasobra sino mayan no tin tereno mas pa nos nietonan. Y ora cu bo ta pensa cu e lider di pais aki ta na banda di su pueblo den e sufrimento aki, bo ta equiboca un biaha mas.

Pasobra Mike Eman a biaha pa 2 siman pa bai representa Hulanda rond di mundo. Mike Eman ta bai biaha mundo rond pa papia di temanan, cu aki na cas mes e no ta ni worry cu nan. Temanan manera naturalesa, siendo cu aki na Aruba e mes ta permiti pa candela na dump keda danja nos naturalesa, e mes ta permiti cu mangrovenan ta wordo destrui pa construi mas condominium y Gereen Corridor. Un otro tema ta pobresa, pero aki na Aruba mes Mike Eman ta aumenta pobresa cu tanto medida cruel contra pueblo.

Unda e prome minister di e pais aki ta ora su pueblo ta sclama pa atencion? Biahando, bibando 'la buena vida', y representa Hulanda.

Mi ta djis spera cu ta Hulanda ta paga tur e gastonan di su biahenan, no solamente su ticketnan di avion, sino tambe su hotelnan, su transporte, y su daggeldvergoeding di casi 1000 florin pa dia, pasobra no ta husto cu pueblo di Aruba mester paga tambe pa propaganda pa Hulanda", lider di MEP Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co