Gabinete ME II: Minister Bermudez a atende reunionnan importante na Europa
![160428 angel OECD](/images/2016-Q2/160428-angel-OECD.jpg)
ORANJESTAD - E siman cu a pasa Minister di Finanzas, Angel Bermudez tabata tin un agenda druk na Europa. E mandatario a participa na un congreso di ‘Organisation for Economic Co-operation and Development’ (OECD) caminda e topico principal tabata corupcion den e relacion entre comercio y aduana.
Minister Bermudez ta splica cu esaki ta un fenomeno mundial, unda cu ta purba di pone presion riba duanero pa e por preferencia un cliente; sea ta pa por entrega mercancia mas tempran, of pa laga pasa contrabanda. Diferente caso a wordo trata y discuti con pa combati e criminalidad aki y tambe e diferente modanan con pa optimalisa e integridad den e cuerpo duanero.
Den transcurso di e biahe aki e mandatario di finanzas a probecha pa haci un bishita tambe cerca Burgemeester Aboutaleb di Rotterdam. Durante e encuentro ambos mandatario a intercambia nan experencia y experticio riba diferente tereno.
Segun Minister Bermudez, aunke Rotterdam ta un ciudad, e ta enfrenta mesun sorto di problematica cu Aruba ya cu e ciudad aki tambe ta conta cu container waf, aeropuerto, turismo y refineria entre otro. Finalmente Burgemeester Aboutaleb a ofrece e mandatario di finanzas tur clase di sosten y a regala Minister Bermudez un buki cu imagen di renobacion di e ciudad.
![160428 aboutaleb bermudez](/images/2016-Q2/160428-aboutaleb-bermudez.jpg)
Expresionnan haci den e articulo aki no necesariamente ta refleha opinion di ArenaPoliti.co