Prome Minister Eman ta orguyoso 
E reconocemento ta pa e caminda cu a cana pa ataca e crisis mundial na Aruba 

WASHINGTON/ORANJESTAD - Durante su viahe di trabou na Washington Prome Minister Eman a reuni cu Menno Snel, kende ta executive director pa IMF (International Monetary Fund) na Merca pa Hulanda. Snel ta sucesor di Age Bakker. Eman tabata contento cu e encuentro cu Snel mirando cu antes tabatin visionnan distinto riba e caminda pa cana ora mester a saca un pais for di un crisis economico y e retonan financiero.

"Aruba a pone un vision hopi cla su dilanti na momento cu nos a hereda e crisis di 2009 cu ciere di e refineria, caida di economia mundial cu un impacto di 15% di e GDP di Aruba, un desempleo di 14%, un situacion hopi afecta di e poder di compra di pais Aruba, turismo cu a bay atras y un pais den cual pa añanan largo e gobierno prome no a haci inversion pa mantencion di bario, scol ni centronan di ciudad ni tampoco a sostene esnan di menos recurso. E vision cu nos a pone tabata cla con saca Aruba di e crisis aki. Esaki tabata door di saca economia for di e crisis cu e tabata aden, pone turismo crece y inverti unda mester a inverti. Asina nos a baha e BBO na mita y a subi e bijstand di esnan di menos recurso cu 25% y a introduci un schoolkinderentoeslag. Esaki tabatin como resultado cu un mama soltera cu dos yiu antes tabata haya 605 florin, a cuminsa cobra 1135 florin cu ta casi dobel di loke e tabata haya. Algo cu a yuda su situacion masha hopi mes. "Nos vision tabata pa trece stabilidad economico prome, inverti pa hende por haya trabou y bin cu un perspectiva pa turismo crece. Creando asina optimismo atrobe den bo sociedad." Eman a enfatisa cu tur esaki a percura cu awe cu IMF, Fitch Ratings y otro institucionnan ta dunando reconocimento pa e vision cu su gobierno a demostra.

"Nos no por ta mas contento cu awe haya compliment di Menno Snel pa e vision cu Aruba a demostra e tempo ey, pero tambe mustrando hopi interes con Aruba ta bayendo den su rol di lider riba tereno di sostenibilidad y energia renobabel. E temanan aki ta haci cu Aruba ta sigui haya mas amistad, mas respet y reconocimento. E hecho cu nos por a demostra di tabatin un vision economico, financiero y social integra hunto, un vision completo, riba un spectrum con nan ta relata na otro, ta muestra cu e vision a traha. Nos a pasa den hopi contratiempo, pero awe nos ta haya reconocimento di institutonan internacional cu un pa un ta bisa cu e caminda cu Aruba a cana ta duna resultadonan positivo. Algo di cual nos ta super orguyoso di dje. Nos a haci e bon escogencia." 

Expresionnan haci den e articulo aki no necesariamente ta refleha opinion di ArenaPoliti.co