‘Inverti den Mucha y Hoben’ 

Ponencia: Cabesante, maestro/a, y mayor mester tin bon relacion y comunicacion cu otro, p’e mucha/hoben tin exito na scol. Discusion riba pago di ‘schoolgeld’ y ‘aircogeld’ no ta contribui na un relacion fructifero y efectivo. Dos siman pasa dos scol primario di S.K.O.A., esta Agnes y Rayo di Solo, a paga airco riba muchanan den klas. A informa mayor cu esaki ta pa falta di mayor cu no a paga ‘aircogeld’.

Veredicto: Huez, den su veredicto di 8 di juli 2015, a dicta cu S.K.O.A. no por obliga mayor pa paga. Tampoco no por tuma represaya contra e mucha si e mayor no paga. Pues no por paga aire condicionado riba e muchanan den klas. Den henter e discusion di contribucion di mayor y pago di suma di airco a bin resulta cu ta gobierno mester financia esaki.

Culpabel: Ta un lastima cu Gabinete Mike Eman ta ocasiona confrontacion entre scol y mayor. Gobierno mester financia S.K.O.A. conforme (1) tratado di derecho di mucha, (2) constitucion y (3) ordenansa nacional di scol primario, basico y avansa.

Calculacion: A calcula e suma cu gobierno mester financia S.K.O.A. E cantidad di mucha/hoben di tur scol di S.K.O.A. a wordo uza for e relato estadistico di Enseñansa di Aruba 2013-2014, publica pa Departamento di Enseñansa Aruba.


Lo costa gobierno alrededor di 2.5 miyon florin pa termina e discusion andando. Conforme tratado, constitucion y ley mester financia S.K.O.A. e suma aki. Lo por tin diferencia chikito den e suma basa riba cantidad di alumno pa e aña escolar 2015-2016.

Prioridad: Gobierno mester bay Parlamento y trece cambio den su presupuesto 2016. Awor ta cuestion di prioridad y boluntad. Nos mester inverti den mucha y hoben, nos futuro generacion.

Expresionnan haci den e articulo aki no necesariamente ta refleha opinion di ArenaPoliti.co