Durante un conferencia di prensa sr. Ezzard Cillie, director medico di Horacio Oduber Hospital, ta expresa su opinion encuanto e maneho di hospital pa loke ta toca privacidad di patient.
Aparentemente sr. Cillie a haña ta necesario pa haci un poco di “damage control” pa motibo di e tantísimo critica cu ta sali publica den medionan di comunicacion y tambe den social media.
Loke a resalta sin embargo, ta cu su mensahe tabata dirigi tambe directamente na e Minister di Salubridad cu a haña ta bon pa cuestiona e hecho cu hospital no a coopera pa duna departamento di salubridad informacion encuanto casonan cu a ser presenta na dicho departamento.

E conferencia di prensa aki a trece algun punto hopi importante den luz di dia.
Na prome lugar ta obvio cu no tin comunicacion entre e Minister y Hospital, apesar cu e minister tin dos representante den e hunta di supervision di hospital.
Loke por conclui ta cu e dos representantenan t’ey pa “spek en bonen”, y cu nan no ta interesa, ni tampoco conoce e importancia, ni tin e experticio pa ta consciente di e significacion cu e unico hospital aki tin pa e pueblo y bishitantenan na Aruba.

Na di dos lugar atrobe ta resalta con e minister ta carece di etica.
E ta busca publicidad tirando lodo y mustrando dede riba otronan, lubidando cu tin tres dede ta mustra riba su persona.
E modus operandi aki nos a wak durante e conflicto cu SABA tambe, na unda e minister a fulmina contra e directornan, pasobra nan a acerca prensa prome cu a papia cu su persona.
Na Hulandes tin un dicho cu ta pas pa e minister mediocre aki: “koek uit eigen deeg”.
Si bo kier respet, mustra y duna respet, y mas importante ainda, duna muestra cu bo tin un vision, un maneho concreto cu tur hende por asimila y comprende.
No ban lubida cu den pasado Raad van Advies a kraak e minister aki for di otro, pasobra ela presenta un presupuesto sin pia y sin cabes.

Last but not least, durante e conferencia di prensa sr. Cillie a señala cu hospital ta tuma privacidad sumamente na serio, y cu esey a conduci cu hende a wordo kita for di trabou di inmediato despues cu a wordo constata cu nan a faya contra e ley di privacidad.
Obviamente aki NO ta trata di un dokter of specialista, pasobra mi no por a tuma nota cu esaki a tuma lugar. Lo ta trata atrobe di personal di hospital cu ta trahando den e nivelnan mas abou den e hierarchia: simpel empleado(nan) y no dokter.

Den pasado mi a denuncia caba e hecho cu na ImSan un dokter a wordo retira, y na unda casonan penal lo a tuma lugar.
Tambe mi a denuncia e hecho cu tin dos specialista a wordo investiga pa posibel casonan di fraude, y aki tampoco nada no a tuma lugar.
Dicon e director no a tuma medidanan contra e dos ciruhanonan cu a haci nan mes culpabel di fraude, haciendo uso di e infrastructura di HOH, esta e OK??

Esaki kiermen cu si bo ta halto den e hierarchia medico, bo tin inmunidad y bo ta "get away with crime"?
Esey kiermen cu e humilde trahador SI ta wordo kita for di trabow of cuestiona, y NO esnan na top?

Ta existi anto ley di trechter na Aruba, na unda corupcion y fraude ta permisibel, basta bo ta na e “bon” banda di e medaya?
Esta cu si bo ta amigo di e Minister, of di e Director di AZV, of di e director di HOH, of di ImSan, bo no ta wordo persigui of kita for di trabow?

UPP ta keda denuncia e forma di proceder aki, y particularmente e forma con e clase trahador SI ta wordo persigui, y no esnan cu por ta, ta haci nan mes culpabel di actonan mucho mas bochornoso.
Ley pa un, y ley pa tur!
No por permiti cu ley di trechter na Aruba ta bira algo comun y coriente, riba ningun nivel!


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, mei 23, 2016

Expresionnan haci den e articulo aki no necesariamente ta refleha opinion di ArenaPoliti.co