Den un conferencia di prensa teni Minister di Turismo Otmar Oduber a bay ampliamente riba e tema di discusion ultimo tempo cu ta all inclusive y su regulacion. Den e conferencia e mandatario a splica bon cla, pasobra ta parce cu diferente instancia no a lesa e documento prepara, cu e ley cu Parlamento lo bay trata no solamente ta papia di regula cambernan all inclusive pero ta regula tambe tur otro acomodacionnan cu ta wordo uza door di bishitantenan.
“Mi kier a tuma e oportunidad awe mirando cu bastante ta e discusionna cu tin den medionan di prensa sigur pa loke ta trata un proposicion di un cambio di ley pa loke ta trata regulamente cu kier bin cu e ley riba All Inclusive na Aruba,”e mandatario a cuminsa pa splica prensa e motibo di e conferencia yama.
Den medionan di comunicacion tabatin hopi intercambio di informacion cual e mandatario ta haya ta algo sano, pasobra e comunidad di e forma aki ta haya informacion pa crea su mesun opinion. Pero loke si e ta haya lamenta ta cu e informacionan aki “no a tuma luga na mesa ora cu nos ta reuni ora cu hopi di e ponencianan aki por a wordo treci dilanti.
E ley di All Inclusive, Minister Oduber a enfatisa, ta un proyecto di Ley di un enbergadura di interes nacional, di interes general di e pais, unda cu e discusion no ta unicamente cu kier regula cierto aspectonan di e forma di aloha di nos turistanan na Aruba, esta e All Inclusive. E mesun proyecto di ley aki, ta regula otro acomidacionnan tambe. Algo cu esnan cu ta critica, di loke e mandatario por a lesa den publicacion den prensa, ta bisa cu mester wordo regula tambe. Nan ta bisa cu Gobierno solamente ta wak den direccion di hotelnan pa regula e acomodacionnan. “Mi ta lamenta atrobe cu no ta lesa e documento den su totalidad. Scuchando oposicion tambe ta papia riba e aspecto akimi tin cu bisa cu den e Proyecto di ley aki netamente e aspecto di ortro acomodacion ta wordo completamente regla.”El a sigui splica cu den e proyecto di ley ta pra cu esnan cu tin casnan cu ta wordo cumpra pa wordo gehuur, condominium como apartamentonan cu ta wordo gehuur cu turista ta wordo reglamenta. Nan tur lo mester pidi e permisonan necesario pa por opera, pasobra aworaki no tine bou di un ley existente. Aworaki si e acomodacion ta bou di 10 camber y si no tin servicio cu ta wordo brinda na e huespednan, no mester pidi permiso.
Cu e cambionan haci den e proyecto di ley, SIAD por cobra e belasting cu actualmente gran parti di e acomodacionnan aki no ta pagando. Esaki ta nifica, Minister Otmar Oduber a señala, cu no solamente “nos ta atende cu e aspecto di all inclusive den ley aki, pero a probecha di e momento aki di biaha pa reglamenta y pone cu tur e operacionnan, posadanan y penshoennan cu tin rond, cu esakinan tambe tin cu wordo reglamenta pa di e forma ey nan tambe tin nan permiso y cumpli cu e reglanan cu tin riba mesa ...”

Expresionnan haci den e articulo aki no necesariamente ta refleha opinion di ArenaPoliti.co