’21 di juni lo tin veredicto’ 

24 di mei 2016: Diamars 24 di mei corte di apelacion (cu tres huez) a trata e caso cu S.K.O.A. a apela contra mayornan. Esaki ta basa riba aumento di ‘schoolgeld’ y ‘aircogeld’ cu S.K.O.A. a anuncia na aña 2015, pa aña escolar 2015-2016.
8 di juli 2015: Aña pasa mayornan a entama un caso sumario contra S.K.O.A. pa aumento di ‘schoolgeld’ y ‘aircogeld’ barbaro y infunda. E caso a wordo trata riba 25 di juni 2015 y veredicto a wordo dicta riba 8 di juli 2015, na fabor di mayornan.
Argumento S.K.O.A.: (1) Den corte, S.K.O.A. (pa medio di su abogado) a admiti cu gobierno debe S.K.O.A. placa di financiamento y pesey S.K.O.A. ta cobra mayor. Sin e placa (alrededor di 1.5 miyon florin) e no por opera su scolnan na un forma debido. (2) Tambe S.K.O.A. a indica cu ningun ley ta impedi’e di cobra mayornan. (3) S.K.O.A. a trece dilanti cu no ta ‘e’ (= e directiva) pero ta ‘oudercommissie’ di cada scol ta cobra ‘aircogeld’.
Huez (1): A wordo puntra na S.K.O.A., door di huez, ki pasonan S.K.O.A. ta tuma contra gobierno pa ricibi su financiamento manera palabra y cu e tin derecho riba dje. S.K.O.A. a bisa cu ta (a) yega na palabracion di financiamento cu gobierno, (b) minister ta pone e palabracion den un decreto ministerial, pero (c) S.K.O.A. no ta ricibi e placa, pues gobierno no ta paga. Huez a puntra dicon S.K.O.A. no ta lanta un caso contra gobierno y laga corte di husticia tuma un decision. E pregunta cardinal aki S.K.O.A. no a contesta y a keda bisa cu “nos ta den negosacion”.
Abogado Mayornan: Nos abogado (mr. Figaroa) a indica cu loke S.K.O.A. ta cobra mayornan ta wordo financia den ley pa gobierno. El a mustra riba ley di enseñansa primario, basico y secundario. Gasto, entre otro cu S.K.O.A. ta cobra, di administracion, mantencion, electricidad y gasto imprevisto mester wordo financia conforme ley door di gobierno. Nos ta di acuerdo cu huez, y esey tambe nos a bisa S.K.O.A.: Hiba gobierno corte. ‘Aircogeld’ ta poni den e carta di S.K.O.A., firma pa su director (interino). Un comision di mayor no ta un persona huridico y no por cobra ‘aircogeld’ den nomber di S.K.O.A. Ley ta prescribi cu gasto di un comision di mayor tambe ta wordo financia, pa e mesun ley, door di gobierno. Nos a indica tambe cu S.K.O.A. a menasa di manda muchanan otro scol si no cumpli cu pago di ‘schoolgeld’ y ‘aircogeld’.
Huez (2): Huez a puntra S.K.O.A. si un mayor a trece solamente e formulario di inscripcion, e mucha lo wordo inscribi? S.K.O.A. a bisa, si!! Nos a indica cu no ta berdad!! Si un mayor bini cu solamente e formulario di inscripcion, e mucha no ta wordo acepta. E mester bini cu prueba di pago di ‘schoolgeld’ y ‘aircogeld’ tambe!!
Veredicto: Dia 21 di juni 2016 huez lo duna su veredicto. A wordo indica cu tin hopi trabao y si no logra p’e fecha indica, e lo bira 30 di augustus 2016. Huez a bisa si cu nan ta consciente cu aña escolar ta den yega su fin.
Otro Caso: Nos tin un otro caso den corte di prome instancia. E caso aki ta declara cu scol ta gratis, manera ratifica pa tratado di mucha y nos constitucion, y mester, definitivamente, wordo financia conforme nos ordenansa nacional di scol primario, basico y general!!!

Expresionnan haci den e articulo aki no necesariamente ta refleha opinion di ArenaPoliti.co