Siman pasa partido MEP a publica un articulo cu e titulo "Entre tur pais na mundo Aruba a bolbe kibra tur record cu un deficit di -9.3% na 2014". Den e articulo aki e partido MEP kier a crea e impresion cu e deficit halto den presupuesto pa 2014 ta a consecuencia di un "mal gastamento di fondonan publico". MEP ta haci un comparacion incorecto y incompleto di e desaroyo financiero di Aruba cu otro paisnan entre 2009 y 2014. Tambe ta cuminsa di awor caba ta desacredita e institucion di Conseho Fiscal (Fiscal Council) cu gobierno di Aruba ta bay crea. E storia incompleto of ni mitar berdad aki di MEP, ta otro ehempel di e incapacidad den MEP pa argumenta nan posicion, di uza cifranan den un forma responsabel y un insinceridad pa futuro maneho (financiero) di Aruba. E insinuacion di MEP cu e Conseho Fiscal lo bira un organo dependiente di politica, ta mustra nan forma di wak aparato di gobierno como un instrumento netamente politico. E ta demostra tambe nan preferencia di tin un CFT imponi for di pafo, enbez confia den nos propio hendenan y den nos pais y desaroya un propio Fiscal Council cu asistencia di e organo internacional di IMF.

DEFICIT 2014
E deficit den presupuesto pa 2014 ta yega -9.2% pa e aña aki pa motibo cu - riba conseho di CFT - ta paga e suma di 170 miyon florin (186 miyon cu interes) pa hisa e cobertura di pensioennan di APFA na 100%. Sin e suma di 170 miyon e deficit lo ta 4.9% manera e tabata calcula den e presupuesto cu a wordo aproba na juni di e aña aki. Pa otro aña 2015 e deficit lo ta 3.2%. E cifranan aki ta den e presupuesto supletorio y a pasa escrutiño di CFT. E intension di MEP obviamente ta pa malinforma comunidad deliberadamente.

STORIA COMPLETO
E comparacion cu nos a haci cu otro paisnan tabata pa wak e efecto di un Fiscal Council riba finansa publico y economia. E comparacion NO tabata pa compara nos economia chikito cu di paisnan grandi. Pero hasta si haci e comparacion di e recuperacion economico cu cotro paisnan, Aruba ta score bon. Esey no ta laga pa un otro biaha.

Den e ariticulo den cua MEP ta bolbe troce e realidad, e ta bolbe compara cifranan di finansa so. E no ta compara cifranan di crecemento economico, di empleo/desempleo, di mehoracion di forsa di compra of di stabilidad di fondonan di pensioen. Siendo cu ta esaki ta loke tur maneho tin como meta final. Pone hende na trabou y crea entrada nobo. Rene Herde':"Ki bal bo tin cifranan financiero bunita, pero hopi hende sin trabou y economia stanca. Na Merca e deficit y debe ta bahando, awor cu e economia ta sigui crece y desempleo ta sigui baha. Hulanda ta contento cu na 2015 porfin nan economia ta bay crece cu 1.5% y desempleo ta baha na 6.5%. Esey despues di 6 aña di austerisacion severo. Pero den tur dos pais e fondonan di pensioen a corta den pensioen di su miembronan y forsa di compra a cay." Na Aruba economia a crece di -12% pa +3% den apenas 3 aña. Desempleo a baha di 12% pa 6.7% den e mes un periodo aki. Fondonan di pensioen ta bek riba pia y sin corta den e pensioen di su miembronan. Forsa di compra a subi compara cu 2008. Esaki ta e parti di e storia cu MEP no kier conta. Lo ta bo pa MEP siña haci un comparacion completo y corecto ora e burba critica. Pero e madurez ey......ainda falta!

Expresionnan haci den e articulo aki no necesariamente ta refleha opinion di ArenaPoliti.co