ORANJESTAD – Proyecto 'Green Corridor' ta avansando di un manera sumamente satisfactorio. Manera planea, e prome parti di asfalt a yega Pos Chiquito caba y trabounan den Pos Chiquito mes a cuminsa algun siman atras.

E parti mas complica di e proyecto ta cuminsa na Pos Chiquito caminda por mira basta material y ekipo caba den e area. E brug nobo di Pos Chiquito, cu ta bou construccion caba y manera hopi sa, esun actual ta bay wordo drecha y ta bay tin un caminda pa cana y tambe uno pa core bicicleta.

Den e bario di Pos Chiquito mes, a cuminsa cu e trabou pa construi e dos vianan nobo mientras cu na mesun momento ta trahando riba embeyecemento di e area na banda. Na Pos Chiquito, y Savaneta, e casnan ta construi relativamente leu di e caretera, cual ta permiti automobilistanan subi e caretera na cualkier punto. Esaki ta forma un peligro y e intencion ta cu Green Corridor ta trece un solucion. E intencion ta pa trece mas siguridad pa tanto esnan na pia como tras di stuur den e area aki.

Riba e combinacion di fotonan aki por mira con e trabou ta avanzando den e bario di Pos Chiquito y bicindario.

Expresionnan haci den e articulo aki no necesariamente ta refleha opinion di ArenaPoliti.co