Minister di Turismo Transporte Sector Primario y Cultura a demostra su posicion pa cu taxistanan di Aruba y ta mira bek atras na momento cu Sr. Oduber a asumi su responsabilidad como Minister di Transporte "Ma para e cobranza carisimo na aeropuerto, ma para nombracion politico di un cantidad grandi di taxista durante campaña di 2009  y a bringa te na final den corte, nos a firma un protocol, a reconoce derecho di taxista pa vacacion y a percura pa mehoracion di nan derechonan fiscal, entre otro. Si tin un Minister cu a para pa taxista ta mi persona y mi lo keda para pa nan." E mandatario ta indica cu taxistanan ta e miho embahadornan di Aruba y pa e motibo aki mes e ta mustra e hecho cu e lo sigui bringa pa nan manera semper el a bin ta haci.
Bisando esaki e ta mustra e hecho cu e MB ultimo ta bin pa reenforsa e leynan existente y nada di loke e tin para den ta contra e permisonan existente. Locual cu lo kier logra cu ne ta pa proteha e propio taxista mas ainda y sigura calidad y siguridad.
Un di e puntonan den e MB ta cu un taxi no por tin autonan cu stuurwiel na man drechi. Gobierno ta kere cu na momento cu bo tin bida di hende den auto y bo ta core cu un auto cu no ta traha pa e trafico cu nos tin na Aruba. De facto e minister ta señala cu e ta di opinion cu no por uza un auto ni pa taxi, ni pa tour, ni pa huur paso bo ta responsabel pa bida di otro hende den e auto. Si e ta un auto personal esey ta keda na cada ken pa dicidi pero na momento cu bo tin un permiso cu bo ta transporta un otro persona y bo ta responsabel pa su siguridad no por uza un vehiculo cu no ta destina pa e tipo di trafico riba nos isla. E di dos punto ta cu a constata un abuso grandi cu ta tuma luga pa locual ta trata 'hulpchauffeurs'. E reglanan ta wordo stipula pa esnan cu ta abusa di e sistema. Enberdad tin hende cu tin e necesidad pe, y Gobierno a bay di acuerdo pa durante e taxista su temporada di vakantie e mes por scoge pa un 'hulpchauffeur'. "Pero no por ta asina cu tin hendenan ta keda 2 pa 4 aña na cas, anto ta uza un 'hulpchauffeur'. Ta uza e permiso den un tipo di negoshi pa nan keda cobra anto e pober 'hulpchauffeur' ta haye ta traha 14 ora of mas, poniendo bida di hende na peliger." e mandatario ta señala. Niun chauffeur lo por conduci un vehiculo pa asina largo cu tur e atencion cu e trafico ta rekeri. Nan ta haya nan cu nan tin cu traha asina largo pa por logra paga e doño di e permiso di taxi y pa nan mes por gana un salario. "E negoshi aki nos a haya sa cu ta cobra e hendenan 480 dollar te cu 600 dollar pa siman, ta bin acerca e auto cu nan mester huur y tambe e gasolin, pa finalmente e mester saca su cen. Na un dado momento nos a constata 70 'hulpchauffeurs' cu mester traha 14 ora riba caminda." Pa locual ta trata traspaso, aki tambe a constata un negoshi grandi cu ta tumando luga.
"Tin hende cu ta pidi pa otro hende cu no ta di famia haya un traspaso di permiso di taxi unda atrobe tin negoshinan ta tumando luga. Nos no ta cambia ley, e ta stipula den e ley, pero awor nos ta vocifera esaki den un MB. E Minister lo no otorga automaticamente ningun traspaso di permiso di taxi pa un otro." E permisonan no ta di e 'vergunning houder' pues taxista no ta doño di e permiso, e permiso ta keda di Gobierno. Minister Oduber ta splica si un dia lo kier traspasa e permiso pa un miembro di famia of un yiu, esey semper ta posibel, y manera e ley ta stipula e Minister ta esun cu lo por tuma un decision riba esaki. "Diaranson awor mi lo reuni cu tur e bondnan di taxi y lo splica esaki bon, pasobra un biaha mas mi ta y lo sigui para pa taxistanan, pero no lo permiti abusonan cu a bin ta tuma luga!"

Expresionnan haci den e articulo aki no necesariamente ta refleha opinion di ArenaPoliti.co