MEP: Publica e carta di Ministerio Publico completo
MEP ta reta Otmar Oduber.
STA CRUZ - Minister Otmar Oduber a perde tur credibilidad desde cu mas di un anja pasa caba e ta menasa cu su retiro.
E anja aki cos a bira mas serio y hasta Otmar Oduber a bai Gobernador pa entrega su carta di retiro cu ta contene 8 punto dicon e mester retira como minister. Eynan ela declara cu Mike Eman no ta sirbi como lider, y cu su coleganan Sievinger, Hooijboer y especialmente Dowers ta strob'e den su trabou. Pero algun siman despues, Otmar Oduber a trek in su retiro. Pero te dia di awe e no kier publica e carta ey!
Ya ta un luna caba cu e minister a core yama un Conferencia di Prensa den pura pa anuncia cu Ministerio Publico lo a declara cu e no a hasi nada malo den e escandalo di STRAWBERRY GATE. Sinembargo e minister no kier publica e carta completo, mustrando atrobe su falta di curashi.
Ta masha hopi cos cuestionabel a pasa den e STRAWBERRY GATE. Ta trata di un persona hopi serca di e minister, cu a campanja cu e Otmar Oduber, cu ta conosi como e criminal mas peligroso di Aruba, cu e minister a dicidi di paga por lo menos $11,000 pa planta strawberry na Aruba.
E placa a somenta y ni un mata di strawberry a wordo planta! Unda e placa ta? Dicon e minister no a screen su amigo prome cu el'a firma contract cun'e? Y ki dia e minister ta duna cuenta kiko su relacion ta cu sr Opsino Span? Tur ta preguntanan cu e minister debe pueblo un contesta!
Ta logico cu ningun hende ta kere su palabranan mas, pasobra e ta un minister cu ta gusta ganja y na mas di un ocasion a manipula cu pueblo. Den e caso aki ta mesun cos.
Minister Otmar Oduber, si bo kier scapa e tiki credibilidad cu bo a resta, stop di sconde informacion y publica bo carta di retiro y e carta di ministerio publico integralmente!
Expresionnan haci den e articulo aki no necesariamente ta refleha opinion di ArenaPoliti.co