Proyecto di mudamento di 'Waf di Carga' pa Barcadera ta un proyecto cu hopi a papia di dje pa decadanan largo. Hopi gobierno a papia di e necesidad pa separa e 'Waf di Carga' for di esun di Crucero, pero nunca a yega mas leu cu describi e problema. Cuminsando na aña 2009, Gabinete Mike Eman I a inverti hopi tempo y esfuerso den haci cu e proyecto por start. Na salida di un reunion cu ehecutivonan di ASTEC (Aruba Stevedoring Company) y di APA (Aruba Ports Authority) Prome Minister Mike Eman a bisa cu e proyecto aki nunca a wordo realisa pa motibo cu tabata tin hopi diferente retonan pa resolve. "Nos a pon'e como un prioridad y hunto cu colega De Meza, nos a traha hopi duro riba e proyecto aki pa na final nos por a logra cu APA y ASTEC por a haya otro," Prome Minister e splica. Tur e esfuersonan y cooperacion entre ASTEC y APA a conduci cu awe tin un desaroyo nobo y construccion di e 'Waf di Container' na Barcadera ta un realidad. Pa final di aña 2015 tur e operacion di containernan ta bay Barcadera.

E waf na Paardenbaai, Oranjestad, na e momentonan aki ta maneha un fluho di trafico for di lama sumamente grandi. Tanto transporte di carga, como movecion di turistanan crucero ta ta pasa via di e waf aki. Figurativa y literalmente, barconan di carga y crucero ta nabega den awa di otro. E infrastructura cu cada uno di e operacionnan aki mester di dje ta diferente. Pesey for di hopi decada caba ta papia cu mester muda e operacion di carga pa Barcadera si kier logra yega e potencial di e desaroyo turistico y na e mesun tempo yega na e eficiencia rekeri pa e operacion di maheho di carga na Aruba.

Algun siman atras Prome Minister y Minister di Asuntonan Economico a haci un recorido di e trabounan na Barcadera cu na e momentonan aki ta bou supervision di APA. E trabounan na e momentonan aki ta relaciona cu e reconstruccion y ampliacion di e facilidad caminda e barconan ta mara (dok) y e parti submarino dilanti di e waf. Una bes cu esaki ta completa, e proyecto ta sigui cu e fase cu ta cay bou supervision di ASTEC. Tur locual ta bin entre e trabounan di APA y e cura di e Waf, ta cay bou supervision di ASTEC.

E presentacion cu Ministernan Mike Eman y Mike de Meza a haya diaranzon ultimo ta di e infrastructura cu ASTEC ta bay percura pe. "ASTEC ta full prepara pa un 'State-of-the-Art' Containerhaven," segun Prome Minister y "na unda  cu e ultimo tecnologianan pa locual ta trata e operacion y maneho di con un container ta drenta, con container ta sali, e logistica, e eficiente, control." Sr. Eman ta enfatisa cu ta hopi importante cu ASTEC ta enfoka riba eficiencia, pasobra e ta hunga un rol hopi importante den e costo y pa e servicio na e cliente. Esaki ta inclui tambe e aspecto di imigracion, Douane y e parti naturalmente di e Stiuador y "bo ta mira un trabou grandi y profesional a wordo haci di un compania Arubiano, algo pa nos ta orguyoso di dje."

E presentacion tabata den den man di director di ASTEC, Sr. Mike de l’Isle y supervisor tecnico di e proyecto, Randy Angela. Hunto cu Prome Minister Mike Eman y Minister di Asuntonan Economico, Sr. Mike de Meza, director di Aruba Ports Authority (APA) Sr. Jossy Figaroa tambe tabata presente pa e reunion importante aki.

Expresionnan haci den e articulo aki no necesariamente ta refleha opinion di ArenaPoliti.co