"Tin un aña ta papia y studia e materia di "all inclusive". E ley a pasa henter e proceso di trahamento di ley, di conseho riba e ley, di contesta pregunta di parlamento, manera tur ley tin cu pasa. Mirando e debate publico cu a bira hopi desagradabel y mas aun mirando e peliger cu a corto plazo algun di e hotelnan grandi lo por wordo bendi y converti den hotelnan "all inclusive", ta necesario pa trata e ley a corto plazo.".  Asina Rene Herde, lider di e fraccion di AVP a bisa awetardi riba pregunta di periodistanan. Ela enfatisa cu e debate a dura basta largo y no ta bini nada nobo aserca. E proceso normal pa cualkier ley a tuma luga cu e ley aki. Mas cu normal a reuni cu diferente organisacion y grupo. Fraccion di AVP a reuni cu 9 diferente grupo of organisacion comercial envolvi den turismo. Pospone e tratamento no ta sirbi niun meta mas segun Herde'.

ENVESTIGACION
Riba e pregunta cu si parlamento tin suficiente informacion, Rene Herde a contesta cu a haya e raport cu gobierno a laga traha. Tin papia di un raport di 2015, pero en realidad esey no a hiba na un conclusion y a usa tur informacion di e prome envestigacion pa esun cu e minister a manda Parlamento. Kier men cu no tin dos envestigacion segun su informacion. Den reunion luna pasa cu Banco Central a papia di un envestigacion di Banco Central cu lo a bini cla den tres siman, pero te awe esey no a bini cla. Rene Herde': "Semper mas informacion ta welcome. Pero tur e raportnan cu nos a wak ta ripiti mas o menos e mescos. E raport di WTO di Nacionnan Uni ta duna un bon resumen di e conclusionnan di experiencia cu "all inclusive hotels" rond di mundo. Nos mester asumi nos responsabilidad y tuma desicionnan bon argumenta y basa riba e informacion cu nos tin. Ademas esaki no ta e ultimo biaha cu lo discuti e tema aki. Aki un par di aña lo evalua e efectonan di e ley y lo por adapta esaki si mester. Awor aki loke ta mas importante, ta cu nos ta sigura cu nos no ta bira manera Mallorca, caminda mucho hopi hotel "all inclusive" a kibra economia di e isla completamente. Den caso di Aruba e peliger ta ainda mas grandi, pasobra cu nos tur ta depende di turismo! E efecto negativo y consecuencianan economico, financiero, social y laboral, cu ta señala rond di mundo di "all inclusive hotels", lo ta ainda pio den nos caso. Pasobra nos tur ta depende di turismo. Ora cos bay malo, e ta afecta nos tur!" Asina Rene Herde a finalisa.

Expresionnan haci den e articulo aki no necesariamente ta refleha opinion di ArenaPoliti.co