Comision a presenta nan prome sugerencianan na Gobierno. 

Diamars Minister Otmar Oduber hunto cu representante di Ministerio di Asuntonan General y di Enseñanza a haya un presentacion for di dos comision cu a wordo instala aña pasa pa medio di Decreto Ministerial. Ta trata aki di e comision nan Implementacion di Arte y Cultura y tambe Digitalisacion y Documentacion di Informacion Cultural. E reunion a resulta uno sumamente fructifero unda cu e diferente partnernan a presenta nan punto di bista y recomendacionnan na Minister Oduber.
Mester bisa cu e presentacion duna ta cuadra perfectamente cu vision di Minister Oduber pa pone cultura riba plataforma principal na unda cu e aspecto di educacion y documentacion ta primordial. Es decir, mester haya miho acceso na informacion cultural no solamente na scolnan, pero tambe den otro formanan manera database, website y medionan di comunicacion.
Tur e partner nan presente, manera Biblioteca Nacional, Archivo Nacional, Curriculum Ontwikkeling y Departamento di Cultura tabata riba e mesun liña tocante e vision aki, esta e importancia di cultura den nos sociedad. Nan a papia di ‘Nation Building’ unda cu cultura ta yega na esey y tambe a papia di e aspecto di cultura como e catalizador economico.
E reunion a bay hopi bon y awor lo continua cu un plan di accion na unda cu lo sigui stimula e posicion di cultura den nos sociedad.

Expresionnan haci den e articulo aki no necesariamente ta refleha opinion di ArenaPoliti.co