Gabinete ME II: Renobacion di scol y construccion di scolnan nobo ta sigui
![Sevinger17](/images/2016-press/Sevinger17.jpg)
Mavo/Havo na Noord tin prioridad y den e dianan aki ta preparando pa bay Parlamento.
ORANJESTAD – Anuncio cu renobacion y mehoracion di nos edificionan educativo ta bay continua a bin dialuna mainta durante un conferencia di prensa ofrece pa Minister di Infrastructura Benny Sevinger hunto cu Prome Minister Mike Eman. Gobierno di Aruba ta consciente di e importancia di e bon condicion di scolnan pa e desempeño di studiante, docentenan y henter e aparato di enseñansa.
“Nos a drecha un cantidad di scol durante ultimo añanan y nos a construi tambe scolnan nobo,” asina Minister Sevinger a enfatisa. Su tras a enfatisa cu e esfuersonan aki ta bay continua y riba e lista di proyectonan tin varios scol cu ta bay wordo renoba, amplia of mehora. Esaki, segun e titular di infrastructura, ta un trabou cu ta haci man den man cu Ministerio di Enseñansa.
Un proyecto en particular cu sigur tin un prioridad halto ta e HAVO/MAVO na Noord cu actualmente ta asina leu den su proceso di desaroyo cu den algun dia lo bay presenta na Parlamento pa haya su aprobacion. Gabinete Mike Eman II tin tur e intencion di cumpli cu e promesa aki haci na pueblo di Aruba y aunke e proceso di planificacion y legal ta tuma su tempo, ta keda pusha pa esaki por ta cla lo mas pronto posibel.
Adicionalmente por menciona e renobacion y ampliacion di Rosa College na Playa, reparacion y mehoracionnan na Cacique Aterima Kleuterschool, Scol Pa Ofishi y Ayo Kleuterschool na Santa Cruz como tambe, Pius X na Dakota.
Construccion di ‘verkeersplateu’ tambe ta forma parti di e mehoracion rond di e scolnan. Fuera di tur esnan cu ya a keda instala rond di Aruba manera na Rosario College na Playa y Scol Preparatorio Nos Paraiso na Paradera, tin varios otro cu ta proximo riba e lista di Gobierno.
Den e presentacion duna dialuna mainta den Sala di Prensa di Bestuurskantoor ta figura verkeersplateaunan riba Driemasterstraat dilanti di St. Franciscus College, na Caya Ernesto Petronia dilant di Dominicus College, riba De La Sallestraat dilanti di e scol di mesun nomber, na Montaña dilanti di Colegio Felipe B. Tromp y tambe dilanti di Biblioteca Nacional na Oranjestad.
Expresionnan haci den e articulo aki no necesariamente ta refleha opinion di ArenaPoliti.co