No por tapa solo cu un solo dede! 

Increibel, pero den e ultimo simannan pueblo Arubano ta wordo bombardia tur dia cu por lo menos 3 comunicado di Prome Minister Mike Eman caminda den su furia di campaña electoral e ta sinta elogia su mes pa loke ta e proyecto scur di PPP, esta di Green Corridor. Tur dia Mike Eman tin un of otro storia pa conta di e proyecto aki y tur biaha e ta trece padilanti cu e Green Corridor lo hisa e calidad di bida di e habitantenen den e barionan parti pariba di nos isla. Sinembargo den tur su palabranan di elogio te ainda Mike Eman no kier splica pueblo con su gobierno lo bay paga pa e proyecto aki y e otro proyectonan PPP, ya cu e financiamento di e construccion ta tumando lugar awor door di inversionistanan priva pero finalmente ora cu e construccion termina e cuenta lo wordo presenta na gobierno y consecuentemente na pueblo, Pa Pueblo Paga.

Raspa den cartera
Loke Mike Eman ta lubida di trece padilanti den tur su comunicadonan ta cu su gobierno di AVP a acorda cu Hulanda y CAFT cu nan lo introduci un Financial Transfer Tax pa financia tur e proyectonan PPP (Hospital, Green Corridor, Ringweg y e MFAnan). E proyectonan aki lo costa total por lo menos 2.3 biyon florin. Sin duda cu e Financial Transfer Tax ta un medida cruel, caminda cualkier transferencia cu un ciudadano haci mediante di su transaccionnan bancario, standing orders, deposita y lanta placa y paga cu su carchi di bancomatico, gobierno cu su dedenan largo ta cla pa bay raspa den su cartera. E medida aki te ainda ta riba mesa di Gabinete Mike Eman y un momento pa otro nan lo bay ehecuta e medida cruel aki riba lomba di pueblo.

Un pais den ruina
Alabes mester remarca cu pa e proximo 25 pa 29 añanan pueblo lo mester bay paga pa tur e proyectonan PPP di Gabinete Mike Eman y esaki na un suma contante y sonante di casi 100 miyon florin pa aña! Mester resalta e echo si cu e medida aki lo bay compromete e proximo 7 gobiernonan di pais Aruba cu no tin arte ni parti den e decisionnan descabeya aki di Mike Eman. Echo ta cu tur instancia local y internacional, manera Banco Central, Asosacion di Banconan, Camara di Comercio, ATIA y tambe IMF y CAFT a conseha gobierno pa no introduci e medida cruel aki, ya cu esaki lo tin un impacto sumamente negativo riba nos economia cu ya ta den deterioro caba. No mester lubida cu na aña 2015 – segun cifranan oficial di Banco Central - nos pais a conoce un crecemento economico di un miserabel 0.1%, pues practicamente NIHIL!
Pregunta final na Mike Eman: Ta con bo kier papia tur dia di hisamento di calidad di bida di nos ciudadanonan, si 120 mil hende den e pais aki y e futuro generacionnan lo tin cu bay sufri y sangra durante e proximo 25 pa 29 añanan pa paga tur aña un suma di casi 100 miyon florin y esaki fuera di e pago di interes riba debe nacional di 210 miyon florin tur aña y tambe di e Megadebe mes di cual for di cada florin 82 cent pueblo tin cu bay pa paga pa e debe astronomico aki? No tin ningun duda cu Mike Eman y un pais den ruina ta sinonimo na otro!

Expresionnan haci den e articulo aki no necesariamente ta refleha opinion di ArenaPoliti.co