Andin Bikker, lider di Partido Democracia Real a bisa den rueda di prensa semanal, cu nan a haya copia di un cambio den e Codigo Civil riba diferente ley laboral, cu Minister Paul Croes kier a introduci, anto netamente e famoso 16-13X, cu awor  ta bay ta articulo 6-14 A.

Bikker a expresa cu den e cambionan aki a haya diferente sindicato hopi indigna na Parlamento, pasobra netamente aña pasa a bay un discusion hopi fuerte y publico di e sindicatonan cu nan a bisa cu nan no ta bay acepta pa nan mishi cu e articulo 16-13X unda cu, basicamente, nan ta haya cu via un porta di cushina ta bay afecta personanan cu tin empleonan vast, via e cambio den e articulonan aki.

Andin Bikker a bisa cu loke e minister kier ta amplia e posibilidadnan di contrato pa tempo defini mientras e sindicatonan no ta di acuerdo aworaki cu mercado laboral ta den un situacion dificil.

Lider di PDR a ilustra cu un ehemplo, caminda e ta bisa cu si un compania ta sirbi un avion tal ora 8’or y pa 8.30 e avion a lanta bek, nan ta “punch out” e trahadornan pasobra nan no tin mag di abandona pia di trabao. Anto ora e otro avion yega nan ta “punch nan in” y asina tin diferente situacion cu ta yega na Fundacion Pro Husticia, cu e ta cu sinti cu tin diferente triki ta wordo haci, unda cu e pueblo laboral ta wordo indirectamente afecta negativamente, riba su payroll na fin di luna.

“E ora ey nos a bisa, well si aworaki cu sindicatonan a sinta mas cu aña na mesa cu señor Paul Croes, y a bise pa no bin cu e proposicion aki pasobra nan tin miedo cu e ta duna caminda pa haci mas mal uso riba e tereno di leynan laboral, y bo ta purba intencione, na final di dia e pueblo trahador ta wordo afecta directa of indirectamente. Mi tin entendi cu Minister Paul Croes a bisa cu e propuesta aki no ta bin, pero pensando cu kizas Dialuna lo a trata e cambionan di Codigo Civil cu tambe tin ley laboral den dje, por ta sr. Croes a pensa cu e por bin cune, anto pase den pura, pero en todo caso te otro siman e tratamento di e Codigo Civil lo sigui, y PDR kier haya aclaracion riba e cambio intenciona aki. Ironia ta cu señor Croes a manda e cambio aki pa e sindicatonan pero Parlamento mes, nos, no a haye. Anto, ora nos ta haya pregunta di pueblo kico ta andando cu e sindicatonan, etc., nos no sa kico pa contesta pasobra ta di nan nos a haya un copia. Awor, e ta ilustra con e gobierno aki ta traha” Andin Bikker a amplia.

El a sigui bisa un persona pafo di Parlamento cu el a haya sa cu a puntre si el a mira esaki caba. “Den prensa e informacion ta bin pero gobierno no ta yega Parlamento. Parlamento ta e ultimo na haya sa cu tin un cambio intenciona anto nan ta bin core bin cune 5 pa 12 den e di dos tanda pa e ora ey no tin tempo pa discuti ampliamente riba dje, anto ta bin votamento”.

PDR ta lamenta e modus operandi aki cu, aparentemente den e caso aki, ta un estrategia cu a wordo hunga y E ta spera cu e sindicatonan di nan banda para duro, pasobra e discusion aki, personalmente mi a kere cu el a caba. “Mi hasta a puntra den e prome tanda di tratamento di e Codigo Civil na Minister Paul Croes si e articulo 16-13X no por ta scondi, cualkier caminda den e nota di cambio, pero e no a haya chens di contesta mi ainda. Pero awor ta resulta cu e ta scondi den otro lachi y cu e ta biniendo cune pa tratamento den Parlamento y nos kier, en todo caso, pa pueblo ta al tanto debidamente di kico e cambionan aki ta encera” Andin Bikker a splica.

Expresionnan haci den e articulo aki no necesariamente ta refleha opinion di ArenaPoliti.co