ORANJESTAD - Minister di Asunto social, Hubentud y Labor drs. Paul Croes tabata esun prome na turno diamars mainta ora cu Parlamento a reanuda e sesion di tratamento di ley di CITGO. Tabata turno pa Ministernan di Gabinete MIke Eman II contesta e preguntanan haci pa Parlamentarionan durante e prome parti di e reunion cu tuma luga dialuna. Segun e Minister encarga cu labor, e trabounan di negociacion y preparacion haci dor di Gobierno a incui tambe combersacionnan cu sr. Boy Anthony, presidente di IOWUA cu ta e sindicato cu ta representa e trahadornan di sector petrolero.

“Mi ta Minister di Aruba,” asina sr. Croes a enfatisa, indicando cu e ta traha pa asina yiunan di tera yega na e cuponan di trabou disponibel y cu e debido preferencia. E mandatario a splica cu dos grupo cu lo traspasa pa e compania nobo, e prome ta esun di benta & mercadeo cu ta maneha benta di mercado local, Valero Marketing and Supply Aruba (VMSA), y e di dos ta e grupo di trahadonan na e terminal di Valero.

Pa duna un siguridad di trabou, tur empleado di VMSA, cu ta 37 en total, a caba di tende cu nan tur lo pasa pa Refineria di Aruba hunto cu tur nan condicion di trabou y beneficio cu tin aworaki. Mescos ta conta pa e 79 trahado di Valero cu awo ta bay pasa bou di CITGO Oil Refinery “conforme nos leynan laboral, cu na momento di ciere e compania nobo mester tuma e trahadonan aki den servicio cu nan añanan di servicio y beneficionan secundario, bonus y otro condicionnan den contracto,” Minister Croes a duna di conoce.

Adicionalmente, diahuebs proximo 29 di september ta bay tuma luga un reunion general di e directiva di CITGO y trahadonan pa asina nan mes por tende y aclaria tur duda tocante nan futuro den CITGO. Minister di Labor Paul Croes: “Nos ta premira cu e proceso aki lo bay ‘smooth’, pa motibo cu durante varios ocasion y den e contracto a mustra CITGO riba e ley cu ta rigi aki na Aruba na momento cu bo tuma operacion over di un compania.”

E grupo di 79 aki ya ta inclui den e cantidad di 600 trahado cu lo tin finalmente den operacion di CITGO. Tur esaki ta puntonan cu Gabinete Mike Eman II ya a papia cu lider di IOWUA. “E trahadonan lo bay over y nan futuro ta garantisa den e refineria. Tur ta yiu di tera, cu ya caba tin hopi aña den e refineria y ta personal cu bo no kier perde paso nan tin un gran conocemento y experiencia. Nan a pasa dor di dik en dun den e compania,” asina Minister Croes a finalisa bisando.

Expresionnan haci den e articulo aki no necesariamente ta refleha opinion di ArenaPoliti.co