Minister de Meza: Dia 22 di october celebracion di reapertura di CITGO ta tuma lugar den Carnival Village
Esaki como muestra di aprecio na pueblo di Aruba.
ORANJESTAD - Pueblo kier celebra e logro di reapertura di CITGO na grandi. Esaki sin duda no ta algo cu ta pasa a base diario, asina ta cu un celebracion ta na su lugar. Minister de Meza, di biaha despues di votacion na fabor di reapertura di Ley di CITGO a conta un poco di e celebracion aki cu ta bay tuma luga den Carnival Village na San Nicolas.
"Dia 22 di october proximo e celebracion ta tuma luga na San Nicolas en Carnival Village. Pero banda di esaki ta bay tin otro actividadnan cu tuma luga den e dianan aki. Nan ta tuma luga hunto cu CITGO. Nos ta yama CITGO bon bini na Aruba y bisa Valero masha masha danki pa e añanan cu nan a traha na Aruba. Nan tabata nos partner strategico den e mundo di petroleo."
Minister de Meza agradecido
Aparte di tabata hopi cansa despues di e reunion pa trata e ley di CITGO, de Meza tabata orguyoso y agradecido. "Mi kier a bisa hopi danki tambe na presidente di Parlamento, sra. Mervin Wyatt-Ras, kende den un forma masha dedica a guia e reunion historico aki. Su trabou tabata fantastico. Mi a gos’e masha hopi mes. El a traha hopi bon cu e publico, cu e fraccionnan presente guiando e reunion cu hopi pasenshi den forma maestral. Tambe mi ta gradici lider di fraccion di AVP sr. Herde, kende hunto cu e miembronan di fraccion a bataya duro mustrando cada bes con e gobierno aki a lucha y traha incansabel pa locual nos a haya awe. Na e demas parlamentarionan cu a vota pro e ley di CITGO tambe mi kier a yama danki pa nan sosten. Esaki ta algo inmensamente grandi pa pueblo di Aruba."
Expresionnan haci den e articulo aki no necesariamente ta refleha opinion di ArenaPoliti.co