Pa loke ta trabou, inversion, impacto economico y riba tereno di finanzas. 

ORANJESTAD- Prome Minister Eman a splica prensa cu e impacto mayor di e rehabilitacion di e refineria ta den añanan 2017 y 2018. Awor aki e refineria mester bay inverti entre 500 pa 600 miyon dollar pa e yega den un estado pa e por refina. "E inversion aki ta nifica cu un cantidad entre 2500 te 3 mil persona ta bay wordo tuma den servicio. Entre nan 500 pa 600 directamente den e refineria mes. Hopi di nan a bay afo pa traha y awor ta spera cu nan ta bin bek. Minister di Labor Paul Croes ta haciendo un trabou grandi pa aloca Arubianonan den e refineria, tanto esnan cu a keda biba aki y a bay haci otro trabou como esnan cu a bay biba den exterior.

Prome Minister Eman a splica cu ta bay duna les na EPB, EPI y otro institucionnan pa yuda e hobennan cu nan cualificacion pa por traha den e mundo industrial. "Gobierno ta bay hunga un rol den esaki door di percura pa nos tin suficiente hende local pa awe y den futuro por traha den e refineria." E transaccion di Valero pa Aruba y Aruba y pa medio di RDA lease cu CITGO tabatin un impacto economico y financiero directo pa gobierno tambe.

"Durante e periodo di Coastal pa El Paso y despues Valero, nos a traha riba un acumulacion di e fondo 'Enviromental Trust Fund' cu tin den dje 19,1 miyon florin cu ta wordo dedica na haci limpiesanan cu nos a tuma como nos responsabilidad pa haci cu e fondo aki. Limpiesanan cu ta importante cu mester wordo haci, specialmente tambe riba e terenonan cu ta bay wordo usa door di Aruba mes unda ta bin un Parke Solar y e cultivo di algen.  Banda di e fondo aki Aruba a haci un settlement agreement cu Valero cu a produci 30 miyon dollar cu Valero a paga pais Aruba. Esaki a bay via e Refineria di Aruba y lo yega den caha di gobierno den forma di dividendo. Ora a finalisa e cuentanan cu Valero a haci un inventarisacion di tur e impuestonan pendiente di diferente tipo y na su despedida Valero a paga 26,2 miyon florin cu a bay directamente den caha di pais Aruba. Esaki sin duda lo yuda economia di Aruba." Eman a splica cu VMSA, cu ta supply gasolin, fuel oil y jet fuel, ta un compania cu tin un balor di 40 miyon florin. Placa cu a wordo traspasa door di Valero pa Aruba. Durante e siguiente lunanan ta bay dicidi si e compania aki (VMSA) ta bay cay bou di RDA of bou di Utilities. "En todo caso a keda dicidi cu VMSA ta keda un compania estatal. E ta keda den un di e NV'nan di cual Aruba ta 100% doño di nan. Ora cu e transferencia oficial tuma lugar Aruba ta haya 40 miyon florin for di e compania estatal bou cual e ta bay cay. Tur esaki ta contribui grandemente na e hecho cu presupuesto di Aruba lo tin un deficit na 2017 di 0,5%, Practicamente un Balanced Budget. Di un pais cu a bin di un deficit di 5 pa 6% na 2009 y cu pa otro aña tin un presupuesto cu ta yega  na 0,5% ta algo grandi", Eman a bisa.

Expresionnan haci den e articulo aki no necesariamente ta refleha opinion di ArenaPoliti.co