Parlamentario mr. Juan Ady Thijsen, apesar di ta hopi ocupa cu tratamento di presupuesto di pais Aruba di 2017, a haya tempo pa scucha habitantenan di Rooi Koochi riba molester di trabaonan di gobierno pa traha un “highway” estilo Palomargo den barionan residencial.

Ta asina aki cu tanto habitantenan y comerciantenan di nos pais ta worde castiga pa trabaonan di construccion di Gobierno di AVP sin tene cuenta cu interesnan individual.

No ta prome biaha, asina nos por a mira trabao den centro di playa perhudica comerciantenan, trahadornan y bishitantenan.
E biaha aki a toca turno na habitantenan di Savaneta, entre otro di Rooi Koochi y vecindario pa sufri na man di e Gobierno aki. Segun Parlamentario mr. Juan Ady Thijsen, Gobierno aki a traha cu miras pa keda cla cu trabaonan prome cu eleccion y no ta importa e sufrimento di habitantenan.

Gobierno ta pensa cu ora trabaonan keda cla e habitantenan lo keda contento y Gobierno di AVP deliberadamente ta trapa bay. Habitantenan no por yega na cas drechi, mester pasa “omweg” riba “omweg”, casnan ta yen di stof, tin cas ta recien geverf. Stof ta malo pa salud y ta trece gasto extra pa habitantenan.
Tambe tin e factor di tempo extra pa “omweg”, tempo extra pa haci limpiesa di cas. Pues kehonan ta multiple y por tin consequencianan duradero especialmente ora ta trata di salud.

Parlamentario mr. Juan Ady Thijsen ta urgi Gobierno pa tene cuenta cu interesnan di habitantenan di Rooi Koochi y tuma pasonan necesario pa alivia problemanan. Savaneta, e.o. Rooi Koochi tambe merece mihor.

Expresionnan haci den e articulo aki no necesariamente ta refleha opinion di ArenaPoliti.co