A pesar cu directiva di Colegio Arubano a pega varios barco cu e nombramento di e dos rectornan anterior, parce cu e no a siña su les. Atrobe e directiva a bay firma un acuerdo cu e rector nobo, sin cu e la haya aprobacion di antemano di e minister di Enseñansa pa su salario. Awor cu e minister ta keda para riba cu e no ta bay subsidia e salario aki, pasobra e no ta usual y tampoco esaki ta e procedura normal, ata e directiva a cuminsa un caso hudicial pa exigi pa e minister (pues pueblo) paga loke e la firma p’e, sin aprobacion di antemano. Y pa kita tur duda, e directiva tabata bon na altura di e maneho y postura di e minister cu e no ta subsidia salarionan abnormal di ningun rector. E la nenga di subsidia e salario no comun di e rector saliente, cu despues e directiva mester a saca esaki for di e presupuesto regular di Colegio Arubano. Anto dicon e directiva a bolbe comete e mesun eror pa bay firma un acuerdo, sin cu e la haya aprobacion prome? Tin un solo contesta pa esaki, e directiva tabata di mala fe. E postura aki ta similar na loke gobierno ta haci cu parlamento: firma prome y ‘bully’ despues pa legalisa algo ilegal.

Interesante pa recorda pueblo, cu e presidente di directiva di Colegio Arubano ta e mesun persona cu a declara, despues cu e la firma e acuerdo cu e rector nobo, ‘Nunca nacionalidad tabata un criterio y nos a haya un candidato hopi bon cu ta na Hulanda (Bon Dia, 20 Augustus 2016)’. Alabes e ta e coordinador principal di e minister-president. Pues un persona cu ta conseha e minister-president riba tur sorto di asunto y cu mester sa hopi bon con delicado e situacion financiero di nos isla, kier forsa e minister di Enseñansa pa legalisa un acto ilegal y asina paga un otro salario no normal na un rector. Te awe pueblo no sa cuanto e ‘afkoopsom’ di e rector saliente a costa, pasobra e mesun directiva di Colegio Arubano a percura pa pone un ‘geheimhoudingsplicht’ den e acuerdo, pa asina sconde su ‘blunder’. Un ‘privilegio’ cu ningun otro cabesante di scol tin. Pues placa cu mester a wordo inverti den educacion di nos futuro generacionnan, ta bay pa paga casonan hudicial, salarionan no normal y paga ‘geheime afkoopregelingen’. Interesante pa sa si den e eventualidad cu directiva di Colegio Arubano perde e caso hudicial, si atrobe e alumnonan lo bay wordo perhudica pasobra placa mester wordo saca di e presupuesto regular pa bay paga un salario abnormal.

Colegio Arubano a wordo dirigi exitosamente pa hopi aña largo pa hende local. Partido ABO ta di opinion cu esaki mester ta e caso atrobe. Nos hende local, mester haya e chens. Docentenan di Colegio Arubano no mester wordo manipula of acepta e pinda di ‘programa pa entrena rectornan local’ cu e directiva a introduci pa susha wowo di algun docente. Na tur pais cu ta respeta su mes, ta su yiunan di tera ta bini prome. Ta su yiunan di tera ta esunnan cu ta ocupa tur posicion clave den tur entidad publico. Wel dicon aki na Aruba e mester ta diferente?

Riba 8 september 2016, ora parlamento a mustra un unanimidad excepcional y e la pasa e ‘Amienda Union Civil’, diferente miembro a sali defende e decision controversial aki cu ‘no por permiti DESEGUALDAD aki na Aruba’. E MEGADEBE a wordo REDOBLA cu e aprobacion di e ‘CITGO-deal’ den parlamento, bou e pretexto cu e lo crea miles di cupo di trabou pa hende local. Awor cu pueblo ta mira cu mayoria di e cuponan ta bay pa stranhero y cu nos ta den un aña electoral, diripiente un minister y algun miembro di parlamento populista a cuminsa grita cu ‘hende local prome’ mester haya trabou. A pesar cu tur e gritonan populista aki tin e meta pa manipula y calma un parti di pueblo, e ta keda remarcabel pa mira cu no tin e mesun entusiasmo ora ta toca pa sali na defensa di Colegio Arubano y nos futuro generacionnan. Unda e maestronan parlamentario ta keda? Dicon nan tur ta keto y pakico ningun ta exigi pa pueblo haya sa cuanto placa a wordo paga na ‘afkoopsom’ na e rector saliente? Dicon e minister-president ta keto, mientras ta su coordinador ta esun cu a hiba su minister di Enseñansa corte?

E ta obvio cu e asunto di Colegio Arubano, no tin atencion di e politico tradicional. Pasobra aki ningun interes politico personal ta wordo sirbi, no tin hopi voto cu por wordo ‘cosecha’ y aki ta e coordinador principal di e minister-president ta e protagonista mayor. Pues pa un caso unda tin un ‘conflict of interest’ directo, cu no a bay conforme reglanan, unda tin un maneho di preferencia y cu por tin atrobe consecuencianan pa e calidad di studio, nos representantenan di pueblo no tin atencion. Parce cu e declaracion di algun luna pasa di ‘no por permiti DESEGUALDAD aki na Aruba’ tabata pa solamente calma pueblo, despues cu parlamento a pasa e  ‘Amienda Union Civil’ controversial. Tristo pa constata atrobe con e politico tradicional ta trata y pensa di pueblo. Pa CITGO ‘hende local prome’. Pa Colegio Arubano, politica di Avestruz!

(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co