ORANJESTAD – E di shete edicion di Green Aruba Conference a clausura diabierna atardi, despues di dos dia di presentacion, panelnan discuctiendo riba varios topico, como tambe reunionnan, firmamento di MOU y hopi intercambio di informacion. Minister di Energia Ing. Mike de Meza hunto cu Minister President Mike Eman a clausura e conferencia gradiciendo un y tur pa nan partipacion, pero sigur tambe e interes pa haci algo na fabor di crea un miho futuro pa nos mundo.

E conferencia a trata temanan relaciona cu e tema principal pa aña, cual tabata ‘Transformacion pa un Mezcla Sostenibel di Energia.’ Green Aruba ta keda un di e conferencianan di mas valioso y importante den e region, treciendo lidernan actual y den desaroyo hunto riba e temanan cu ta esencial pa e realisacion di un mundo sostenibel.

For di alineacion di polizanan publico, financiamento y e ehecucion tecnico, Green Aruba ta cubri e areanan necesario pa trece solucionnan pa otro nacionnan, na mesun momento cu nos isla ta avansa den su caminda pa sostenibilidad total. E evento ta caracterisa su mes como e plataforma pa iniciativanan cu a hiba na resultadonan palpabel y e edicion aki no tabata diferente.

Riba e di dos y ultimo dia di e conferencia a firma dos MOU cu instancianan internacional di caliber. E acuerdonan aki ta sirbi como prome paso pa mas impulso den e esfuerzonan cu ya caba Gabinete Mike Eman ta haciendo pa un transicion exitoso pa energia limpi, desaroyo di pilar di conocemento y proteccion di nos recursonan natural. Pa mas informacion, bishita www.greenaruba.org.

Expresionnan haci den e articulo aki no necesariamente ta refleha opinion di ArenaPoliti.co