Awe 31 di December nos ta recorda cu 2 aña pasa un di e fundadornan di partido MEP, Efrain de Kort a bay laga nos. Efrain a aparece riba nos lista for di 1971 te cu eleccion di 1983. Durante e trayectorio impresionante di su bida el a ocupa varios funcion importante, manera entre otro hefe di Servicio Informativo di gobierno, parlamentario den Staten di Antiyas, miembro di Conseho Insular di Aruba, diputado pa asuntonan financiero, desaroyo economico y cuido social. Na 1973 el a keda postula como Ministro di Finanza di Antiyas pa partido MEP y pa cual el a demostra di ta un bon gobernante. Danki na su trabao exitoso como ministro e economia di Aruba a desaroya positivamente. Esaki pa motibo cu Efrem a introduci un sistema nobo pa paga impuesto pa e compania petrolero Lago. Tambe Efrem tabata Presidente Comisario di Banco Central, Presidente Comisario di Compania di Utilidad y Fundador di Banco di Desaroyo di Aruba.

Efrem a forma parti di diferente comision, cualnan a bishita diferente pais pa hiba e mensahe di e pueblo di Aruba, esta e deseo pa ser liber. El a lucha schouder cu schouder cu nos Libertador Betico Croes pa logra e Status Aparte entrante 1 di januari 1986. Efrem ta conoci di ta un politico cu den reunionnan di Parlamento e por a defende su maneho na un forma corecto y riba un nivel halto.

Cu hopi gradicimento nos di MEP lo sigui recorda Efrem de Kort como un politico leal y un gobernante ehemplar cu a yuda construi e Aruba di awe.

Expresionnan haci den e articulo aki no necesariamente ta refleha opinion di ArenaPoliti.co