Pueblo di Aruba, si un minister (cu titulo) no por comprende un splicacion cu henter Aruba si por compronde, con bo mester categorisa e minister aki? Na 2012, su persona no tabata sa e diferencia entre Propiedad (Assets) y Ganashi (Profit). Hasta via Corte Comun di Aruba, huez a dicta contra e minister aki, dunando e alegacion cu e minister, a base di su echonan den Parlamento, corectamente por wordo yama “lol’i awa”. Na Papiamento esaki ta wordo uza, pa ilustra debidamente con malo un persona a haci su trabao y of con absurdo un persona su declaracionnan por ta.

Den e caso aki, ta trata di Minister de Meza, kende un biaha mas ta sobresali cu expresionnan fofo cu ta  demostra cu e no ta compronde nada di loke a wordo publica pa CFT/CAFT den nan ultimo carta nr 201700004, data 11 januari 2017. De Meza ta menciona cu CAFT no ta papia e berdad y ta desmenti tur alegacion y ta yam'e 'infunda'. E ta bisa cu e refineria ta di Aruba y cu no por pone e refineria como borg sin autorisacion di Aruba. E declaracion aki di De Meza ta indica indudablemente cu de Meza NO a compronde loke CAFT a publica. CAFT ta bisa cu ta e pueblo di Aruba (Land Aruba) ta para garantia pa no menos cu US$ 300 miyon te na un maximo di e total inversionnan di Citgo. Ningun momento CAFT ta referi na e complexidad, esta e refineria. De Meza ta troce e berdad pa asina e pueblo no cuestiona gobierno di AVP. Ta pa e pueblo no spanta y bira intrankil door di compronde e obligacion financiero monstruoso cu ta colga riba e cabes di e pueblo. Esaki por yega te na 10.000.000.000 US$, incluyendo e pipa di gas etc etc. De Meza ta biba den un mundo di halucinacion (manera Baba Herde cu su piedra) keriendo cu ta e refineria CAFT ta indica na dje. Absolutamente cu no! Ta pa e risiconan y nan consecuencia financiero di e Citgo contract cu Aruba a mara su mes na dje, CAFT ta sumamente preocupa. Den 2017 e inversionnan di Citgo ta bay cuminsa wordo registra. Anto kende ta para garantia pa esakinan atrobe? Cu PDVSA a haya su mes obliga pa hipoteca su interes den CITGO USA, ta exclusivamente pa motibo financiero di e propio PDVSA y no pa Citgo Aruba. PDVSA y Citgo Holding ta keda limpi di cualkier obligacion financiero pa Citgo Aruba. Gobierno di AVP a pura habri e refineria pa scapa cara cu CAFT entregando un presupuesto 2017, cu ta cuadra cu 0.5% di e balor monetario di e economia di Aruba (GDP). Esaki door di incorpora entradanan cuantioso di Citgo. CAFT despues di a controla e presupuesto 2017, ta bin bisa cu esaki NO ta corecto ni responsabel pa motibo cu tur e indicadornan cu gobierno a registra como entrada door di e Citgo deal, NO ta cuadra cu expectativanan real di entrada pa cu 2017. Un presupuesto FICTICIO atrobe. Conclusion: un lol’i awa ta keda un lol’i awa te cu dia cu e no ta un lol’i awa mas. Pues pa awor e ta???

Expresionnan haci den e articulo aki no necesariamente ta refleha opinion di ArenaPoliti.co