Benny Nisbet (PPA): Con por ta posibel cu inversionista ta ricibi derecho riba tereno pa construi hotel etc. Anto esaki no ta mara na un periodo?
Ministro Benny Sevinger a reacciona riba esnan cu a critica e hecho cu lo tin un 4 pa 5000 kamber di hotel, all inclusive, apartments, etc den e asina jama proceso di planificacion. El a splica cu bao di gobernacion di AVP ta solamente e hotel Ritz Carlton a keda cla y esey lo tabata un projecto di e gobierno anterior esta gabinete Oduber. Na mes momento ministro Sevinger ta indica cu e lista casi completo di projecto cu lo tin pendiente lo ta compania cu tin e derecho/permiso pa hasi esaki di gobernacionan prome cu e actual gobierno.
Ministro Sevinger(AVP) a accentua cu e lista di compania cu permiso pa construi hotel riba tereno cu nan lo tin derecho riba djele ta di e gobernacion anterior …. Esaki ta un punto hopi importante pa nos (PPA) profundisa nos mes aden. Pa nos esey kiermen cu tin algo robez den nos sistema di gobernacion di duna compania derecho riba tereno cu ta propiedad di pueblo y duna nan e derecho di construi un projecto manera un hotel etc. Pasobra e gobierno actual di AVP tin casi ocho (8) anja ta goberna y si ainda e permiso ta di gobernacion anterior ta nifica …cu nos sistema di duna un permiso pa construi un hotel aparentemente no ta mara na un periodo/termino..??
Con por ta cu pais Aruba esta gobierno ta duna tereno na compania y e derecho di construi un hotel of otro projecto riba djele anto esaki no ta mara na un termino cual si e termino pasa e derecho riba e tereno y pa construi e projecto ta ‘smelt’ esta jega su final. Pasobra si locual Ministro Sevinger ta splica ta correcto ta nifica cu no ta gobierno ta guia e proceso esta ora nos economia ta ricibi un of mas hotel (expancion) pero ta esnan cu a ricibi e tereno cu derecho di construi un hotel kizas un 15/20 anja atras derrepiente pa nan motibo ta dicidi cu awor ta construi e projecto.
A. Na prome lugar nan a strobe gobierno di por duna un otro grupo di inversionista pa desaroya algo pasobra nan a keda cu e tereno durante un periodo sumamente largo.
B. E otro punto kizas menos bon ta cu net ora cu gobierno no ta desea un expancion ata e grupo encuestion ta didici di construi su projecto poniendo mas pression riba e necesidad di infrastructura y consecuentemente e presupuesto di pais Aruba.
PPA ta di opinion cu tur permiso pa construi un projecto sea di hotel of cualkier otro projecto lo mester ta mara na un periodo na cual e grupo di inversionista lo mester cumpli cunele si e periodo/termino pasa anto nan no a logra …gobierno lo por expande of termina e proceso cu e grupo encuestion….Tambe ta sina cu no ta pasobra un compania ja kaba tin un projecto di hotel aki na Aruba cu nan mester ricibi permiso di expande hora cu nan tin e gana aki. Esaki mester ta un ‘two way street’ , e expancion lo mester cuadra den e vision di gobierno, e lo mester eleva e projecto di hotel y nos producto turistico di Aruba y e no mester ta un cambio for di kamber normal pa ‘all inclusive’ ora nan tin gana di hasi esaki…..E compania entrepreneur lo mester argumenta esaki debidamente pa gobierno. Lo ultimo aki a worde parcialmente regla den e ley di ‘all inclusive’ algun tempo atras.
PPA ta desea un splicacion di gobierno respecto e problematica aki y e observacionan cu PPA a hasi. Nos pueblo merece un splicacion mas en extenso.
Lo ta bon pa Ministro Benny Sevinger repasa e lista y mencion na kada posibel projecto di ki tempo ta trata un ‘toezegging’ di parti di gobierno y cual gobierno …pa nos como sociedad por saca conclusion cu den futuro lo mester bin un cambio al respecto.
Aruba, 31 di januari 2017
Lider Politico di PPA
BENNY NISBET
Expresionnan haci den e articulo aki no necesariamente ta refleha opinion di ArenaPoliti.co